ჯანდაცვის მინისტრის მოადგილის, თამარ გაბუნიას განცხადებით, ფაიზერის ვაქცინა რიგის დაჯავშნის პორტალზე 25 მარტის საღამოს საათებიდან აისახება. მისივე თქმით, ფაიზერით ვაქცინაცია 30 მარტიდან დაიწყება.

"დღეს უკვე საღამოდან ფაიზერის ვაქცინა აისახება რიგის დაჯავშნის პორტალზე და მოქალაქეს ექნება საშუალება გააკეთოს არჩევანი ასტრაზენეკასა და ფაიზერს შორის.

ფაიზერის ვაქცინით ვაქცინაცია 6 სამედიცინო დაწესებულებაში ჩატარდება. უშალოდ ვაქცინაცია კი სამშაბათიდან [30 მარტი] დაიწყება", — განაცხადა გაბუნიამ.

Pfizer-ის ვაქცინის 29 250 დოზა საქართველოში 25 მარტს გამთენიისას ჩამოიტანეს. ამიერიდან მოქალაქეებს კორონავირუსის საწინააღმდეგო აცრის ჩატარება ორი, AstraZeneca-სა და Pfizer-ს შორის არჩევანის გაკეთებით შეეძლებათ.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო. ჯანდაცვის მინისტრის, ეკატერინე ტიკარაძის განცხადებით, ვაქცინაციის პროცესში 65 წელს ზევით მოქალაქეებიც 25 მარტიდან ჩაერთვებიან.

მინისტრის მოადგილე, თამარ გაბუნიამ კი არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.