მოძრაობა შეცვალეს აქტივისტებმა ოკუპირებული აფხაზეთიდან ცენტრალური ხელისუფლების მიერ კონტროლირებად ტერიტორიაზე გადმოსული მოქალაქეებისთვის კარანტინის მოხსნა მოითხოვეს.

"რეალურად საქართველოს ხელისუფლება გააზრებულად თუ გაუაზრებლად თავისი გადაწყვეტილებით ოკუპაციის ლეგიტიმაციას ახდენს, როდესაც საქართველოს დანარჩენი მოქალაქეებისთვის არ არის კარანტინი და ოკუპირებულ ტერიტორიაზე მცხოვრები მოქალაქებისთვის კი, კარანტინი აქვთ დაწესებული. ალტერნატივად ხელისუფლებამ გადმოსული ადამიანებისთვის PCR ტესტირება შეიძლება გამოიყენოს.

მეორე უფრო დიდი პრობლემაა, როცა განათლების მისაღებად იქიდან ბავშვები გადმოდიან და ამ უაზრო კარანტინის გამო სკოლის მოსწავლეებს კონსტიტუციით მინიჭებული უფლება შეზღუდული აქვთ. ჩვენ კიდევ ერთხელ მოვუწოდებთ ხელისუფლებას, გააუქმოს ეს დისკრიმინაციული კანონი", — განაცხადა "შეცვალეს" აქტივისტმა, ოთო შენგელიამ.

ენგურის ხიდზე გადაადგილება შეზღუდულია და წელიწადზე მეტია ადგილობრივებს ცენტრალური ხელისუფლების მიერ კონტროლირებად ტერიტორიაზე თავისუფლად მიმოსვლის შესაძლებლობა არ აქვთ. გზა საქართველოში Covid-19-ის პირველი შემთხვევის დაფიქსირებისთანავე ოკუპირებული აფხაზეთის დე ფაქტო მთავრობამ ჩაკეტა. ადგილობრივები ამბობენ, რომ აფხაზებთან გარკვეული სახის მოლაპარაკების საფუძველზე ხიდის გადაკვეთის შესაძლებლობა არის, თუმცა ბარიერი საქართველოს მთავრობის მიერ დაწესებული 5-დღიანი სავალდებულო კარანტინია. აღსანიშნავია, რომ საქართველოს სხვა მოქალაქეებისთვის სავალდებულო კარანტინის რეჟიმი არ მოქმედებს.

ევროკავშირის სადამკვირვებლო მისიის კვლევით, როცა ენგურის ხიდი გახსნილია, მას დღეში 2 580-მდე ადამიანი კვეთს. ეს ნიშნავს იმას, რომ უკვე ერთ წელზე მეტია დაახლოებით ამდენივე ადამიანს ყოფითი პრობლემები ყოველდღიურად ექმნება.

გაიგეთ მეტი: