საქართველოში პირველი ასტროფოტოგრაფის, დავით დვალის მიერ დაფუძნებული ასტროფოტოგრაფთა ჯგუფის, Geo-Astro-ს გადაღებული გულის ნისლეულით შეგიძლიათ საყვარელ ადამიანს ვალენტინობა მიულოცოთ.

გულის ნისლეული, რომელსაც IC 1805-სა და Sharpless 2-190-ს უწოდებენ, დედამიწიდან 7500 სინათლის წლის დაშორებით, კასიოპეას თანავარსკვლავედის მიმართულებით მდებარეობს - ჩვენი გალაქტიკის პერსევსის მკლავში. ამ ემისიურ ნისლეულში შეინიშნება მნათი იონიზირებული წყალბადის აირი და მუქი მტვრის ბილიკები.

ნისლეულის ინტენსიური წითელი ნათება და მისი კონფიგურაცია გამოწვეულია მის ცენტრთან ახლოს მდებარე ვარსკვლავების პატარა ჯგუფისაგან. ეს ღია ვარსკვლავთგროვა, რომელსაც მელიოტ 15 ეწოდება, შეიცავს რამდენიმე კაშკაშა ვარსკლავს, რომლებიც მზის მასას 50-ჯერ აღემატებიან. ასევე ამ გროვაში შევხვდებით ბევრ მკრთალ მნათობს, რომელთა მასა მზის მასის პატარა ნაწილია.

ქართველმა ასტროფოტოგრაფმა, დავით დვალმა გულის ნისლეული თბილისიდან გადაიღო. ასტროფოტოგრაფი 7,3 საათის განმავლობაში აგროვებდა 7500 წლის წინ წამოსულ სინათლეს კამერის სენსორზე. საბოლოო შედეგი კი ასეთია:

ფოტო: DAVID DVALI

თუმცა, დავით დვალი მარტო არ ყოფილა, ვინც გულის ნისლეული გადაიღო. ასტროფოტოგრაფმა ლევან ვერძეულმაც მიმართა თავისი აპარატურა კასიოპეას თანავარსკვლავედის მიმართულებით. ლევანმა, დათოსგან განსხვავებით, ბაზალეთიდან გადაიღო გულის ნისლეული. რადგანაც ბაზალეთში სინათლის დაბინძურება ძალიან მცირეა, 2 საათის განმავლობაში შეგროვებული სინათლე საკმარისი აღმოჩნდა ასეთი ფოტოს მისაღებად:

ფოტო: LEVAN VERDZEULI

დიმიტრი გოდერძიშვილმა აბასთუმნის ასტროფიზიკურ ობსერვატორიაში ყოფნისას გულის ნისლეულთან ერთად, სულის ნისლეულიც გადაიღო. 2,25 საათიანი ჯამური ექსპოზიციით, ასტროფოტოგრაფმა გული და სული ჩადო და შედეგიც საოცარი მიიღო (ფოტოზე მეტეორსაც ხედავთ მწვანე ფერში):

ფოტო: DIMITRI GODERDZISHVILI