ნაციონალური მოძრაობის ერთ-ერთი ლიდერი, ხატია დეკანოიძე ამბობს, რომ თუ ყოფილი პრემიერმინისტრი, გიორგი გახარია ახალ პოლიტიკურ მოძრაობას შექმნის, ეს, პირველ რიგში ქართულ ოცნებას დააზიანებს.

"თუ რაიმე სახის პოლიტიკურ მოძრაობას შექმნის, ეს, პირველ რიგში, რა თქმა უნდა, დააზიანებს ქართულ ოცნებას. ჩვეულებრივი ჩამოშლის პროცესია. ისევე, როგორც ძალიან დააზიანა გადადგომის შემდეგ ჩრდილოვანი მმართველობა. ამიტომ, მე ასე კონკრეტულად რაიმე სახის ძლიერ ალას ნამდვილად ვერ ვხედავ მისი სახით", — განაცხადა დეკანოიძემ TV პირველთან საუბარში.

მისი თქმით, საზოგადოებას ახსოვს, რომ გიორგი გახარია "არის მთავარი შემოქმედი 20 ივნისის".

"ჩვენ ყველას ძალიან კარგად გვახსოვს, რომ იგი არის მთავარი შემოქმედი 20 ივნისის. მთავარი შემოქმედი ადამიანების დასახიჩრების, რომლის დროსაც და შემდეგ, არ დასჯილა არცერთი სამართალდამცავი უწყება. მას საკმაოდ კარგი კავშირები აქვს, მათ შორის, რუსეთთან — ესეც არ უნდა დაგვავიწყდეს", — ამბობს დეკანოიძე.

დღეს, გიორგი გახარიამ განაცხადა, რომ პოლიტიკიდან წასვლას არ აპირებს.

"გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — უთხრა ჟურნალისტებს გახარიამ.

გახარიამ პრემიერმინისტრის თანამდებობა 18 თებერვალს დატოვა და ამის მიზეზად ნაციონალური მოძრაბის თავმჯდომარის, ნიკა მელიას საქმეზე ქართული ოცნების გუნდში აზრთა სხვადასხვაობა დაასახელა.

გაიგეთ მეტი: