ქართული ოცნების დეპუტატის, ლადო კახაძის განცხადებით, იგი, როგორც პოლიტიკური პროცესების უშუალო მონაწილე, ყოველთვის მოხარული იქნება, რომ ქვეყნის სამსახურში გამოცდილი ადამიანები ჩადგნენ. ამის შესახებ მან On.ge-სთან განაცხადა და ყოფილი პრემიერმინისტრის, გიორგი გახარიას განცხადებას გამოეხმაურა.

"ადამიანმა დააგროვა და ყველა ადამიანი აგროვებს თავის ცხოვრებისეულ გამოცდილებას პროფესიულ, სამეცნიერო, პოლიტიკურ ასპარეზზე და ეს გამოცდილება მას საშუალებას აძლევს განკარგოს შეძენილი ცოდნა თავის და ქვეყნის სასარგებლოდ, ყველას აქვს არჩევნის უფლება, რასაკვირველია, ამ შემთხვევაში ადამიანებს სრული თავისუფლება აქვთ თავისი პოტენციალი მოახმარონ კეთილ საქმეს, თავის ქვეყანას.

მე ვარ მონაწილე ამ პოლიტიკური პროცესების და ყოველთვის მოხარული ვიქნები ჩვენი ქვეყნის სამსახურში გამოცდილი ადამიანების ჩადგომის, იმიტომ, რომ ჩვენი ქვეყანა ახლა სწავლობს დემოკრატიის ახალ პრინციპებს, დიდი გამოწვევები გვაქვს და ჩემთვის მთავარია, რომ პოლიტიკურმა აქტორებმა ერთმანეთთან ითანამშრომლონ", — თქვა კახაძემ.

პრემიერმინისტრობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

18 თებერვალს, ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიას გადადგომამდე ხმები მანამდეც ვრცელდებოდა, თუმცა გადადგომამდე 6 დღით ადრე მან განაცხადა, რომ არსად მიდის და ჯერჯერობით "მოდის".