პარლამენტის თავმჯდომარე, არჩილ თალაკვაძე ამბობს, ნაციონალური მოძრაობის თავმჯდომარის, ნიკა მელიას საკითხი ბლოკავს მოლაპარაკებას მმართველ პარტიასა და ოპოზიციას შორის. სწორედ ამიტომ, თალაკვაძის თქმით, მელიამ უნდა გამოიჩინოს პასუხისმგებლობა და გადაიხადოს გირაო.

"როდესაც შენ ხედავ, რომ შენი საკითხი მთავარი პოლიტიკური მოლაპარაკების დაბრკოლებაა და მთავარ პოლიტიკურ მოლაპარაკებას ბლოკავს მხოლოდ ის, რომ შენ გირაოს გადახდა არ გინდა, ელემენტარული პასუხისმგებლობა, რომ უნდა გამობრძანდე და გადაიხადო ეს გირაო.

არც ეს არ გააკეთეს. არც თავისმა მეგობრებმა არ გადაუხადეს და შემოვლითი გზით, ანუ, უფრო რთული და დამაზიანებელი გზით, ითხოვდნენ ამ საკითხის გადაწყვეტას", — განაცხადა თალაკვაძემ საზოგადოებრივი მაუწყებლის ეთერში.

18 მარტს, ევროკავშირის წარმომადგენლის, კრისტიან დანიელსონის მედიაციით, ქართულ ოცნებასა და ოპოზიციას შორის ბოლო მოლაპარაკება გაიმართა. 10-საათიანი შეხვედრის შემდეგ დანიელსონმა განაცხადა, რომ საბოლოო შეთანხმება ვერ მოხერხდა და მედიატორმა დღეს ბრიუსელში გაემგზავრა.

მოლაპარაკებებზე ერთ-ერთი მთავარი განსახილველი საკითხი ე.წ. პოლიტპატიმრების, ნიკა მელიასა და გიორგი რურუას გათავისუფლებაა.

მელია თითქმის ერთი თვის წინ, 23 თებერვალს, საკუთარი კაბინეტში, სპეცრაზმის დახმარებით დააკავეს. თბილისის საქალაქო სასამართლომ, პროკურატურის მოთხოვნა აღკვეთის ღონსიძების სახით გირაოს შეფარდების შესახებ 17 თებერვალს დააკმაყოფილა. საქმეს მოსამართლე ნინო ჩახნაშვილი განიხილავდა.

გაიგეთ მეტი: