კორონავირუსით ინფიცირების გაზრდილი მაჩვენებლის ფონზე, საფრანგეთის პრეზიდენტმა, ემანუელ მაკრონმა, პარიზისსა და საფრანგეთის ჩრდილოეთ ნაწილში 4-კვირიანი ლოქდაუნი გამოაცხადა. საფრანგეთის პრემიერ-მინისტრმა, ჟან კასტექსმა ხუთშაბათს განაცხადა, რომ ქვეყანაში ეპიდემიის მესამე ტალღა მიმდინარეობს. ლოქდაუნი პარასკევს, შუაღამიდან ამოქმედდება.

ლოქდაუნის პერიოდში სკოლები ღია იქნება და მოსახლეობას სახლიდან 10 კილომეტრის რადიუსში გარეთ გასვლისა და ვარჯიშის შესაძლებლობა ექნება. ეპიდემიის ცხელი წერტილებიდან სხვა რეგიონებში გადაადგილება საპატიო მიზეზის გარეშე იზღუდება.

ხუთშაბათს საფრანგეთში კორონავირუსით ინფიცირების 35 000 ახალი შემთხვევა დაფიქსირდა, ინტენსიურ განყოფილებაში კი იმაზე მეტი პაციენტი მკურნალობს, ვიდრე ეპიდემიის მეორე ტალღის დროს.

აღსანიშნავია ისიც, რომ საფრანგეთს, ევროპის სხვა რამდენიმე ქვეყანასთან ერთად, Oxford-AstraZeneca-ს ვაქცინის გამოყენება დროებით შეჩერებული ჰქონდა, თუმცა მას შემდეგ, რაც ევროკავშირის სამედიცინო რეგულატორმა დაასკვნა, რომ Oxford-AstraZeneca-ს ვაქცინის გამოყენება უსაფრთხო და ეფექტიანია, პრემიერ-მინისტრის განცხადებით, საფრანგეთი ვაქცინაციის პროცესს გააგრძელებს.