შინაგან საქმეთა სამინისტროს ინფორმაციით, დაკავებულია ადამიანი, რომელმაც ნაციონალური მოძრაობის ოფისის გარე ფასადზე გაკრულ ბანერს ესროლა.

1991 წელს დაბადებული მოქალაქე, ცეცხლსასროლი იარაღის მართლსაწინააღმდეგო შეძენა-შენახვა-ტარებისა და სხვისი ნივთის დაზიანების ბრალდებით დააკავეს. იგი დანაშაულს აღიარებს.

"პოლიციამ, დაკავებულის საცხოვრებელი ბინის ჩხრეკისას, დანაშაულის ჩადენის იარაღი — პნევმატური პისტოლეტი, ცეცხლსასროლი იარაღის ვაზნები და ნარკოტიკული საშუალება მარიხუანა ნივთმტკიცებად ამოიღო", — ვკითხულობთ შსს-ს მიერ გავრცელებულ განცხადებაში.

გამოძიება სისხლის სამართლის კოდექსის 236-ე და 187-ე მუხლებით მიმდინარეობს, რაც 4-დან 7 წლამდე ვადით თავისუფლების აღკვეთას ითვალისწინებს.

ენმ-ს ოფისს გუშინ, 17 მარტს ესროლეს.

ამ ფაქტს გამოეხმაურნენ პარლამენტის თავმჯდომარე, არჩილ თალაკვაძე და მმართველი პარტიის თავმჯდომარე, ირაკლი კობახიძე.

თალაკვაძის თქმით, "ქართულ ოცნებას არაფერში სჭირდება პლაკატებისკენ სროლა", კობახიძემ კი არ გამორიცხა, რომ ენმ-ს ოფისზე სროლა თავად პარტიის დადგმული იყოს.