საერთაშორისო ინსტიტუტებში ვიზიტების შემდეგ პრემიერმინისტრი ირაკლი ღარიბაშვილი ამბობს, რომ ქვეყანაში "ხელოვნურად შექმნილი პოლიტიკური კრიზისისთვის" საფუძველი არ არსებობს. მისი თქმით, ამაზე ის მიანიშნებს, რომ პარტნიორები არჩევნებს აფასებენ კონკურენტულ, სამართლიან და თავისუფალ გარემოში ჩატარებულად.

"არავითარი საფუძველი არ არსებობს ხელოვნურად შექმნილი პოლიტიკური კრიზისისა. შესაბამისად, მინდა მოვუწოდო ყველა მხარეს, რომ მაქსიმალურად მოკლე დროში შევძლოთ კონსტრუქციული დიალოგის ფარგლებში გამოსავლის პოვნა", — განაცხადა მან მთავრობის სხდომაზე.

მანვე აღნიშნა, რომ იმედი აქვს ოპოზიციის "კონსტრუქციული ნაწილის" და იმის, რომ ამ დღეებში სახელმწიფოებრივ გადაწყვეტილებას მიიღებენ.

"ჩვენი მხრიდან კიდევ ერთხელ ვადასტურებთ მზაობას, რომ გავაგრძელოთ კონსტრუქციული დიალოგი", — განაცხადა მან.

მისი თქმით, ვიზიტი იყო ძალიან წარმატებული, ასეთივე წარმატებული იყო განხორციელებული რეფორმების განხილვა.

პრემიერმინისტრი ბრიუსელში 15 მარტს გაემგზავრა. ის საქართველო-ევროკავშირის ასოცირების საბჭოს მე-6 სხდომაში მონაწილეობდა. გარდა ამისა, შეხვდა NATO-ს გენერალურ მდივნს, იენს სტოლტენბერგს. საერთაშორისო პარტნიორებთან შეხვედრებისას ერთ-ერთი მთავარი თემა ქვეყანაში მიმდინარე პოლიტიკური კრიზისი იყო.

გაიგეთ მეტი: