NATO-ს გენერალურმა მდივნმა, იენს სტოლტენბერგმა პრემიერმინისტრ ირაკლი ღარიბაშვილთან ერთობლივ კონფერენციაზე საქართველოში ბოლო პერიოდში მიმდინარე პოლიტიკურ ვითარებასა და ნაციონალური მოძრაობის თავმჯდომარე, ნიკა მელიას დაკავებაზე წუხილი გამოთქვა. სტოლტენბერგის თქმით, NATO საქართველოსგან მოელის, რომ ის ბოლო წლების დემოკრატიულ სტანდარტებს მიემხრობა და და პოლიტიკური განსხვავებების გადაჭრა დიალოგის გზით მოხდება.

"პრემიერმინისტრო, ჩვენი მჭიდრო თანამშრომლობა ნიშნავს, რომ არ ვერიდებით რთულ დისკუსიებს. NATO-ს საქართველოში განვითარებული ბოლო დროინდელი პოლიტიკური მოვლენები აღელვებს, მათ შორის მთავარი ოპოზიციური პარტიის ლიდერის დაკავებით.

ველოდებით, რომ საქართველო ბოლო წლების დიდი მუშაობით დამკვიდრებულ დემოკრატიულ სტანდარტებს შეინარჩუნებს, რაც პოლიტიკური უთანხმოების დიალოგის გზით გადაწყვეტასა და საზოგადოებაში განხეთქილების გამომწვევი რიტორიკისა და ქმედებების არ გამოყენება გულისხმობს. NATO ევროკავშირის მედიაციის ძალისხმევას მხარს უჭერს", — განაცხადა სტოლტენბერგმნა.

მან, ასევე, ღარიბაშვილს ოპოზიციასთან თანამშრომლობისკენ მოუწოდა.

პრესკონფერენციაზე NATO-ს გენელურმა მდივანმა საქართველოს ტერიტორიაზე რუსეთის ფედერაციის მიმდინარე ოკუპაციაზეც ისაუბრა და NATO-ს მიერ საქართველოს ტერიტორიული მთლიანობისა და სუვერენიტეტის ურყევ მხარდაჭერას კიდევ ერთხელ გაუსვა ხაზი. მან, ასევე, რუსეთს საქართველოს ტერიტორიებიდან თავისი ჯარების გაყვანისკენ მოუწოდა.

პრემიერმინისტრი ბრიუსელში 15 მარტს გაემგზავრა. ის საქართველო-ევროკავშირის ასოცირების საბჭოს მე-6 სხდომაში მონაწილეობს.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.