NATO-ს გენერალურმა მდივნმა, იენს სტოლტენბერგმა პრემიერმინისტრ ირაკლი ღარიბაშვილთან ერთობლივ კონფერენციაზე მას ოპოზიციასთან თანამშრომლობისკენ მოუწოდა.

"NATO მხარს უჭერს მედიაციის პროცესს, რომელსაც ევროკავშირი ხელმძღვანელობს. ბატონო პრემიერო, მოგიწოდებთ, ოპოზიციასთან იმუშაოთ, რომ თანამშრომლობისთვის საერთო საფუძველი გამონახოთ. საქართველო ჩვენთვის ნამდვილად ფასეული პარტნიორია და ვაფასებთ პოლიტიკურ პარტნიორობას", — განაცხადა სტოლტენბერგმა.

პრესკონფერენციაზე NATO-ს გენელურმა მდივანმა საქართველოს ტერიტორიაზე რუსეთის ფედერაციის მიმდინარე ოკუპაციაზეც ისაუბრა და NATO-ს მიერ საქართველოს ტერიტორიული მთლიანობისა და სუვერენიტეტის ურყევ მხარდაჭერას კიდევ ერთხელ გაუსვა ხაზი. მან, ასევე, რუსეთს საქართველოს ტერიტორიებიდან თავისი ჯარების გაყვანისკენ მოუწოდა.

პრემიერმინისტრი ბრიუსელში 15 მარტს გაემგზავრა. ის საქართველო-ევროკავშირის ასოცირების საბჭოს მე-6 სხდომაში მონაწილეობს.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.