ბრიუსელში ვიზიტით მყოფი საქართველოს პრემიერმინისტრი, ირაკლი ღარიბაშვილი განცხადებით, არჩევნების ლეგიტიმურობასთან დაკავშირებული კითხვები ოდირისა და ევროკავშირის ანგარიშებმა და განცხადებებმა გამორიცხა.

"კითხვები, რომლებიც ჩატარებული არჩევნების ლეგიტიმურობას უკავშირდება და რომელზეც ჩვენ ბოლო ანგარიში ვნახეთ ოდირის, ევროკავშირის და დღესაც იგივე დადასტურდა. რეალურად ეს გამორიცხავს ყოველგვარ კითხვას, რომელიც ამ ხელოვნურად შექმნილი კრიზისიდან მომდინარეობს", — განაცხადა ღარიბაშვილმა.

მან იმედი გამოთქვა, რომ "ოპოზიციის კონსტრუქციული ნაწილი პარლამენტის მუშაობას შეუერთდება".

პრემიერმინისტრი ბრიუსელში 15 მარტს გაემგზავრა. ის საქართველო-ევროკავშირის ასოცირების საბჭოს მე-6 სხდომაში მონაწილეობს.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და იუსტიციის მინისტრი გოჩა ლორთქიფანიძე იმყოფებიან.