ქართული ოცნების თავმჯდომარის, ირაკლი კობახიძის განცხადებით, მხარეებს შორის არსებული რადიკალური აზრთა სხვადასხვაობის გამო მოლაპარაკებების პროცესი რთულია. შესაბამისად, კობახიძე ფიქრობს, რომ ეს შეთანხმების კონკრეტულ პუნქტებზეც აისახება.

"ჩვენ ვამტკიცებდით, რომ არჩევნები კი არ გაყალბდა, არამედ ოპოზიციამ გააყალბა PVT და ჩვენ დავამტკიცეთ ეს. ოპოზიცია ამტკიცებდა, რომ გაყალბდა არჩევნები და ვერ დაამტკიცა. აქ უკვე, რა თქმა უნდა, არის რადიკალური აზრთა სხვადასხვაობა და შესაბამისად, ეს აისახება, შეთანხმების კონკრეტულ პუნქტებზეც", — აღნიშნა კობახიძემ.

მისივე თქმით, იგივეა პოლიტპატიმრების შემთხვევაშიც.

"ოპოზიცია ამბობს, რომ საქართველოში არიან პოლიტპატიმრები, თუმცა ჩვენ და საზოგადოებამ ვიცით, რომ საქართველოში პოლიტპატიმრები არ არიან. საქართველოში არიან კრიმინალები პოლიტიკაში მხოლოდ. ეს ყველამ იცის, მაგრამ ოპოზიცია განსხვავებულ რამეს ამტკიცებს... რთული ამოცანა აქვს ბატონს დანიელსონს, თუმცა მე კვალავ იმედს ვიტოვებ, რომ შეთანხმებამდე მივა ეს პროცესი", — განაცხადა ქართული ოცნების თავმჯდომარემ.

მისივე თქმით, კონსულტაციები ხვალაც გაგრძელდება.

დანიელსონთან ქართული ოცნებისა და ოპოზიციის შეხვედრები 14 მარტს უშედეგოდ დასრულდა, რის გამოც შარლ მიშელის წარმომადგენელმა თბილისში ვიზიტი ერთი დღით გადადო.

დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: