საერთაშორისოდ აღიარებულმა ჩელისტმა, იო-იო მამ, მასაჩუსეტში, კოვიდვაქცინაციის ცენტრში ექსპრომტად კონცერტი მოაწყო, მას შემდეგ, რაც კორონავირუსის ვაქცინის მეორე დოზა გაიკეთა. მუსიკოსი 18 გრემის მფლობელია და კარიერის განმავლობაში მილიონობით ჩანაწერი აქვს გაყიდული.

15-წუთიანი შესრულება მოიცავდა ბახისა და შუბერტის ნაწარმოებებიდან ნაწყვეტებს და ყველასთვის ცნობილ ავე მარიას.

თანამშრომლების თქმით, როდესაც მუსიკოსმა პირველი დოზა გაიკეთა, ადგილი მშვიდად და შეუმჩნევლად დატოვა. მეორე დოზის მიღების შემდეგ კი შესასვლელში ჩამოჯდა და შესრულება დაიწყო.

"მთელი შენობა გაირინდა, მხოლოდ მუსიკის ხმა ისმოდა. დისტანციით რიგში მდგომი თვითმხილველებმა კი მას მადლობა ვრცელი აპლოდისმენტებით გადაუხადეს", — ამბობენ თვითმხილველები.

"ასე უნდა გადიოდე კლინიკიდან", — თქვა მუსიკოსმა და დასძინა, რომ სურდა ექიმებისთვის და მეცნიერებისთვის მადლიერება გამოეხატა.

კორონავირუსს აშშ-ში ნახევარ მილიონზე მეტი ადამიანი ემსხვერპლა. პრეზიდენტი ჯო ბაიდენი იმედოვნებს, რომ მაისიდან უკვე ყველა ზრდასრული შეძლებს ვაქცინის მიღებას, ხოლო 4 ივლისს, ამერიკის დამოუკიდებლობის დღეს, ამერიკა ერთიანად იზეიმებს. შტატებში ვაქცინის პირველი დოზა 15 დეკემბერს შეიტანეს.