ქართული ოცნების თავმჯდომარის, ირაკლი კობახიძის განცხადებით, თუ ოპოზიციის თვითმიზანი მოლაპარაკებების ჩაშლა არ არის, მაშინ წარმატების "ძალიან კარგი საფუძველი" არსებობს. ამის შესახებ მან რუსთავი 2-ის ეთერში ისაუბრა.

"[დანიელსონთან შეხვედრის] დეტალებზე დღეს ვერ ვისაუბრებთ. უნდა დაველოდოთ მომდევნო ორ დღეს და მას შემდეგ, რაც დასრულდება მოლაპარაკებები, უკვე გაკეთდება კომენტარები პოზიციებთან დაკავშირებით. იმისათვის, რომ ჩვენმა რომელიმე განცხადებამ გარკვეულ თემებთან დაკავშირებით, იქნება ეს პატიმრების, არჩევნების, რომელიმე ამ თემაზე არ გვსურს განცხადების გაკეთება, იმისთვის, რომ გაგრძელდეს შეუფერხებლად დიალოგის პროცესი.

მე დარწმუნებული ვარ, რომ სწორი მიმართულებით წარიმართება ეს პროცესი. ჩვენი მხრიდან, ყოველ შემთხვევაში, ამისთვის ყველაფერი გაკეთდება. თუ ოპოზიციის თვითმიზანი არ არის დიალოგის ჩაშლა, ამ შემთხვევაში წარმატების ძალიან კარგი საფუძველი არსებობს", — ამბობს კობახიძე.

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: