ევროპული საქართველოს ერთ-ერთი ლიდერის, გიგა ბოკერიას განცხადებით, ღარიბაშვილისა და ივანიშვილის კომენტარი არის რეპრესიული ნაბიჯების გადადგმა. აღნიშნულით ბოკერია TV პირველის მასალებზე სასამართლოს გადაწყვეტილებას გამოეხმაურა.

"კომენტარი ღარიბაშვილის, ივანიშვილის და მისი რეჟიმის არის დღეს რეპრესიული ნაბიჯები. ამ რეპრესიული ნაბიჯების გადადგმა, შემდგომი ნაბიჯების საფრთხე მთელი საზოგადოებისთვის და მათ მიიღეს გადაწყვეტილება, რომ უნდა ჩაახშონ ის წყაროები, დასაჯონ ის საშუალებები, რომლებიც ამ დისკომფორტს უქმნიან მათ ღირსებას", — განაცხადა ბოკერიამ.

მისი თქმით, სამართლებრივი მანქანა სასამართლოს ჩათვლით მოწოდებულია მხოლოდ ივანიშვილის პირადი ღირსების დასაცავად.

"ჩვენ დღეს ვხედავთ ვითარებას, როდესაც გამოძიება დაიწყო არა იმ მიმართულებით, რომ უნდა იყოს მხილებული პოტენციურად ძალაუფლების ბოროტად გამოყენების, ზეწოლის, მუქარის ფაქტები ივანიშვილის გარემოცვის მხრიდან, კერძოდ დღევანდელი პრემიერმინისტრის, ღარიბაშვილის, ბატონი ჩუბინიძისა და ბერა ივანიშვილის მიმართ, არამედ გამოტანილ იქნა გადაწყვეტილება მედიის ჩხრეკის თაობაზე და მათი პროფესიული საიდუმლოების წყაროების იძულებით გამხელის თაობაზე. ვიმეორებ, არცერთ სხვა ვითარებაში მსგავსი ნაბიჯი არ გადადგმულა და ეს უკვე საკმარისი არის დემონსტრირებისთვის, თუ როგორ მოქმედებს დღეს სამართლებრივი მანქანა სასამართლოს ჩათვლით, ის არის ის არის მოწოდებული მხოლოდ ივანიშვილის პირადი ღირსების დასაცავად", — ამბობს ევროპული საქართველოს ლიდერი.

სასამართლოს განკარგულების მიხედვით, თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

"საგამოძიებო მოქმედებების ჩამტარებელ პირს ან ორგანოს უფლება აქვს წინააღმდეგობის გაწევისას გამოიყენოს იძულების პროპორციული ზომა", — წერია განკარგულებაში.

კითხვით, მისცემენ თუ არა ჩანაწერებს პროკურატურას, On.ge ნოდარ მელაძეს დაუკავშირდა. მისი თქმით, ამისთვის პროკურატურამ შესაბამისი განჩინებით უნდა მიმართოს, ახლა კი "გაურკვეველ კონვერტს" და "ელექტრონულ მატარებელს" ითხოვს. მისივე თქმით, იურისტები უკვე ამზადებენ შესაბამის საპასუხო წერილს, რომელიც პროკურატურას გაეგზავნება.