ქართული ოცნების დეპუტატის, ირაკლი ჩიქოვანის განცხადებით, ევროპარლამენტარების განცხადებები საქართველოში მიმდინარე პოლიტიკურ ვითარებასთან დაკავშირებით ზოგიერთ შემთხვევაში სუბიექტური იყო, მაგრამ ამბობს, რომ მთავარი პათოსი იყო ის, რომ ევროპის სახელით საქართველოში რევანში ვერ შედგება.

"რა თქმა უნდა, ზოგიერთი განცხადება რიგ შემთხვევებში იყო გამსჭვალული პოლიტიკური სუბიექტურობით, მაგრამ მთავარი და მთავარი არის ის, რომ ყველამ დიალოგისკენ მოგვიწოდა. მე რაც ამოვიკითხე და დავინახე საერთო პათოსი იყო ის, რომ ევროპის სახელით საქართველოში რევანში ვერ შედგება. ეს არის ფაქტი", — განაცხადა ჩიქოვანმა.

ევროპარლამენტის საგაზაფხულო სესიის ფარგლებში საქართველოში არსებულ პოლიტიკურ ვითარებასთან დაკავშირებით დებატები გუშინ, 9 მარტს გაიმართა. დებატების თემა საქართველოში არსებული პოლიტიკური კრიზისი იყო. ევროპარლამენტარება ქვეყანაში მიმდინარე პოლიტიკურ დაპირისპირებაზე შეშფოთება კიდევ ერთელ გამოხატეს და მხარეებს დიალოგისკენ მოუწოდეს.

საქართველოს შესახებ მომხსენებელი ევროკავშირის საგარეო ურთიერთობებისა და უსაფრთხოების საკითხებში ევროკავშირის უმაღლესი წარმომადგენელი და ევროკომისიის ვიცე-პრეზიდენტი, ჯოზეფ ბორელი იყო.

ევროპარლამენტის პლენარულ სესიას ესწრებოდა საქართველოს საპარლამენტო დელაგაციაც, რომელსაც საქართველოს პარლამენტის ევროპასთან ინტეგრაციის კომიტეტის თავმჯდომარე, მაკა ბოჭორიშვილი ხელმძღვანელობდა.

გაიგეთ მეტი: