ევროპარლამენტარი და ევრონესტის თავმჯდომარე, ანდრიუს კუბილიუსმა საქართველოში შექმნილ პოლიტიკურ ვითარებასთან დაკავშირებულ განხილვაზე ხელისუფლებასა და ოპოზიციას ნამდვილი ევროპელებივით მოქცევისკენ მოუწოდა.

"საქართველოს ხილვა ამ გრძელვადიან პოლიტიკურ კრიზისში ძალიან რთულია. ეს არის დემოკრატიის კრიზისი. დემოკრატიის სიმწიფე ნიშნავს არჩევნების გამჭვირვალობას, კანონის უზენაესობას, სასამართლოს მიუკერძოებლობას, დემოკრატიული ღირებულებების დაცვასა და სამართლიან საპარლამენტრო პროცესებს.

ერთი წლის წინ მხარეებს 8 მარტის შეთანხმება გულწრფელად მივულოცე და ვიმედოვნებდი, რომ საქართველოს დემოკრატია ჩვეულ რეჟიმს დაუბრუნდებოდა. საწუხაროდ, ერთი წლის შემდეგ საქართველო უარეს მდგომარეობაშია. არ ვაპირებ ურთიერთდაბრალების პოლიტიკურ თამაშში მონაწილეობას. მე მხოლოდ მოვუწოდებ ორივე მხარეს ნამდვილი ევროპელებივით მოიქცნენ.

ვისარგებლებ მომენტით და შევაქებ შარლ მიშელს თავისი ინიციატივისთვის. იმედი მაქვს, ქართველები გაითვალისწინებენ, რომ ეს არის ევროკავშირის უმაღლესი ჩართულობა ამ კრიზისში და მოვუწოდებ ქართველ მეგობრებს ეს შესაძლებლობა ხელიდან არ გაუშვან", — განაცხადა კუბილიუსმა ევროპარლამენტში სიტყვით გამოსვლისას.

ევროპარლამენტის საგაზაფხულო სესიის ფარგლებში საქართველოში არსებულ პოლიტიკურ ვითარებასთან დაკავშირებით დებატები დღეს, 9 მარტს გაიმართა. დებატების საკითხი საგაზაფხულო სესიის დღის წესრიგში ევროპელი დეპუტატების ინიციატივით შევიდა. საქართველოს შესახებ მომხსენებელი ევროკავშირის საგარეო ურთიერთობებისა და უსაფრთხოების საკითხებში ევროკავშირის უმაღლესი წარმომადგენელი და ევროკომისიის ვიცე-პრეზიდენტი, ჯოზეფ ბორელი იყო.

ევროპარლამენტის პლენარულ სესიას ესწრებოდა საქართველოს საპარლამენტო დელაგაციაც, რომელსაც საქართველოს პარლამენტის ევროპასთან ინტეგრაციის კომიტეტის თავმჯდომარე, მაკა ბოჭორიშვილი ხელმძღვანელობდა.

ევროპარლამენტის პლენარული სესია 8 მარტს გაიხსნა. მუშაობას იგი 11 მარტს დაასრულებს.