"შკოლნიკი", "ხუთოსანი", "წიგნის ჭია" — ეს იმ მეტსახელების მცირე ჩამონათვალია, რომლითაც კლასში ყველაზე მაღალი აკადემიური მოსწრების მქონე ადამიანებს ამკობენ. თუ ეს ადამიანი შენ ხარ, ალბათ, მეტსახელებთან ერთად სწავლისადმი შენი დამოკიდებულების შესახებ ბევრი ფრაზა თუ მოსაზრება გაგიგია. მათი ნაწილი მართალია, ნაწილი კი — ტყუილი, თუმცა ეს აბა ვის ესმის?!

ამ სტატიაში 10 მოსაზრებას, ფრაზას თუ დამოკიდებულებას მოვუყარეთ თავი, რომელიც, დიდი ალბათობით, საკლასო ოთახში ერთგული მეგობარივით დაგყვებოდა:

1. ყველას ეგონა, მთელ დღეს მეცადინეობაში ატარებდი

სინამდვილეში, გაკვეთილებს ყურადღებით უსმენდი, სახლში საშინაო დავალების მომზადებას რამდენიმე საათს უთმობდი და ცხოვრებას სხვა მოკვდავებივით აგრძელებდი.

2. და სწავლის გარდა, ინტერესები არ გქონდა

მეცადინეობას ჰობებს, სხვადასხვა წრეებზე სიარულსა და მეგობრებთან ერთად გართობას მშვენივრად უთავსებდი. სწავლის გარდა, ძალიან ბევრი ინტერესი გქონდა, მაგრამ როცა ამის შესახებ ამბობდი, ყველა გპასუხობდა: "მეგონა, მარტო სწავლა გაინტერესებს."

3. საკონტროლოს წინ კლასში ყველაზე პოპულარული ადამიანი ხდებოდი

მოულოდნელად ყველას მოსწონს შენი ვარცხნილობა, შენს ხუმრობებზე იცინიან და შენ გვერდით დაჯდომა დასწრებაზეა. აბა, გამოიცანი, დღეს რა დღეა?!

4. თუმცა ხანდახან ბრძოლაში მასწავლებელი იმარჯვებდა და წინა მერხთან გსვამდა

და კლასს ერთობლივი გმინვა აღმოხდებოდა!

5. ხანდახან ამდენ გადაწერაში შენი რვეული გარბოდა

საშინაო დავალების ჩაბარების წინ თუ საკონტროლოს დროს შენი რვეული რიგებსა და მერხებს შორის მოგზაურობდა, ბოლოს კი კლასელებისგან შეშინებული თავს გაქცევით შველოდა.

6. დავალებების ჩასანიშნად ყველა შენ გირეკავდა ან გწერდა

შენი მობილურისა თუ სახლის ტელეფონის რეკვის სიხშირე იმ კლასელების რიცხვის პროპორციულად იზრდებოდა, რომლებმაც იმ დღეს სკოლა გააცდინეს.

7. როდესაც მასწავლებელი რთულ კითხვას სვამდა, ყველა შენ შემოგყურებდა

და როდესაც არასწორად პასუხობდი, ყველა გაოგნებული იყო. რატომღაც მთელი კლასი თვლიდა, რომ ყველაფერი იცოდი.

8. მასწავლებელებს მაგალითად ხშირად მოჰყავდი

თითქოს კარგ ნიშნებზე მნიშვნელოვანი ქვეყნად არაფერი ყოფილიყოს. ხანდახან ამ მიზეზით რაღაცებს სპეციალურად აშავებდი, მაგრამ ყველა გპატიობდა და უარესად ბრაზდებოდი.

9. "შენ რა გენაღვლება"

ეს ფრაზა მშობელთა კრების წინ ყველაზე ხშირად გესმოდა. რა მენაღვლება და ბევრი რამე! თითქოს კარგ ნიშნებს გლობალური დათბობის პრობლემის მოგვარება, ან მსოფლიო მშვიდობის დამყარება შეეძლო.

10. ყველა პრეზიდენტობას გიწინასწარმეტყველებდა

ნუ პრემიერ-მინისტრობას, ექიმობას, იურისტობას თუ სხვა პოპულარული პროფესიის დაპყრობას ხომ მაინც გიწინასწარმეტყველებდნენ? და თუ მათ იმედებს არ გაამართლებდი, აბა რისთვის გინდოდა ის კარგი ნიშნები?!