სამოსის ქართულმა ბრენდმა, ჯოვანი მორამ, ახალი ლიმიტირებული კოლექცია შექმნა, რომელზეც ქართველური ენებიდან აღებული სხვადასხვა სიტყვაა გამოსახული.

კოლექციის შექმნა კომპანიის ერთგვარი კამპანიის ნაწილია, რომლის ფარგლებშიც სხვადასხვა ქართველური ენის — სვანურის, ლაზურის და მეგრულის — პოპულარიზება ხდება.

ფოტო: ჯოვანი მორა

ფოტო: ჯოვანი მორა

ჯოვანი მორას განცხადებით, სამოსზე გამოსახული სიტყვები ამ ენების თეზაურუსიდან ამორჩეული საინტერესო მნიშვნელობის ლექსიკური ერთეულებია. სვიტრებსა და ჰუდებზე მათი დატანის მიზანი კი ყოველდღიურ მეტყველებაში ამ სიტყვების დამკვიდრებაა, რაც, ასევე ემსახურება ქართველურენობრივი მრავალფეროვნების ფართო საზოგადოებისთვის გაცნობას.

ფოტო: ჯოვანი მორა

ფოტო: ჯოვანი მორა

"შემოქმედებითი თავისუფლების" პოვნის სურვილით ოთხი წლის წინ შექმნილი ქართული ბრენდი, ჯოვანი მორა, მომხმარებლისთვის ინოვაციური პროდუქტების შეთავაზებით გამოირჩევა. 2018 წელს კომპანიამ ანტიოკუპაციური საზრისის მქონე საპასპორტე გამოუშვა, რომლის მიზანიც გზავნილის — "რუსეთი ოკუპანტია" — მსოფლიოში გავრცელება იყო.

კარანტინის პერიოდში ბრენდმა ასევე შექმნა ციფრული აქსესუარები ტრადიციული დიზაინით — ერთგვარი ფილტრი — ონლაინშეხვედრებისთვის.

მოგვიანებით, ჯოვანი მორა თიბისის პროექტ "ქართულ ქსოვილშიც" ჩაერთო და უძველესი ქართული ფრესკებიდან აღდგენილი პატერნებით რეალური აქსესუარების სერია გამოუშვა.

ქართველური ენების სიტყვებით შექმნილი კოლექციის დათვალიერება ბრენდის ფეისბუქგვერდზე შეგიძლიათ.