საქართველოს ახალგაზრდა იურისტთა ასოციაციის ინფორმაციით, ყრუთა კავშირის წევრმა, დ.დ.-მ ყრუთა კავშირს სასამართლო დავა მოუგო. მის ინტერესებს სასამართლოში საიას თბილისის ოფისი იცავდა.

საიას ცნობით, დავა შეეხებოდა 2015 წელს ყრუთა კავშირის არჩევნების შედეგების გაუქმებას. კერძოდ, მომჩივანი მონაწილეობდა კავშირის პრეზიდენტის არჩევნებში, თუმცა მის კანდიდატურას არჩევნების დღეს კენჭი არ ეყარა.

კენჭისყრაში მონაწილეობაზე უარს ყრუთა კავშირი ასაბუთებდა იმით, რომ კენჭისყრის მომენტისათვის დ.დ.-ს მოხსნილი ჰქონდა საკუთარი კანდიდატურა. აღსანიშნავია, რომ მას უარი არ ჰქონდა ნათქვამი კენჭისყრაში მონაწილეობაზე და საკუთარ მხარდამჭერებთან ერთად (რომელთაც არ ეძლეოდათ შენობაში შესვლის შესაძლებლობა), იმყოფებოდა შენობის გარეთ მიმდინარე აქციაზე.

საიას ინფორმაციით, სასამართლომ განმარტა, რომ არჩევნების სხდომას ესწრებოდნენ პრეზიდენტობის მეორე კანდიდატის მიმართ არაოპოზიციურად განწყობილი წევრები, ხოლო ვერ ესწრებოდნენ დ.დ.-ს მომხრეები. შენობაში შეღწევისათვის მათ მიმართ ხორციელდებოდა პოლიციელთა წინააღმდეგობა.

სასამართლომ ასევე განმარტა, რომ "ასარჩევ პრეტენდენტებს წესდებით გააჩნიათ უფლება თანაბარ საარჩევნო გარემოზე, რაც წინამდებარე შემთხვევაში დ.დ.-ს მიმართ დარღვეულ იქნა". ამიტომ, სასამართლომ გააუქმა პრეზიდენტის არჩევნების შედეგები და პრეზიდენტის არჩევნები ხელახლა უნდა ჩატარდეს.