პარტია ლელოს წარმომადგენლებმა პროკურატურაში განცხადება შეიტანეს TV პირველის მიერ გავრცელებულ ჩანაწერებთან დაკავშირებით გამოძიების დაწყების მოთხოვნით.

პარტიის ერთ-ერთი ლიდერი, კახა კოჟორიძე ამბობს, რომ ამ განცხადებით პროკურატურას შეახსენეს მისი ვალდებულება.

"საქართველოს სისხლის სამართლის საპროცესო კოდექსში პირდაპირ წერია, რომ მედიის მეშვეობით ინფორმაციის გავრცელება, რომელიც შეიცავს დანაშაულის ნიშნებს, პირდაპირ წარმოშობს პროკურატურის ვალდებულებას, რომ დაიწყოს გამოძიება.

ხაზგასმით მინდა აღვნიშნო, რომ საუბარია არა პროკურატურის უფლებამოსილებაზე, არამედ საკანონმდებლო ვალდებულებაზე. ამიტომ, ჩვენ, როგორც იურისტები, ვამბობთ პირდაპირ, რომ მოცემულ შემთხვევაში გამოძიების არდაწყება პროკურატურის მხრიდან, პირდაპირ ნიშნავს დაუმორჩილებლობის გამოცხადებას საქართველოს კანონმდებლობისადმი და მორჩილების გამოცხადებას, მმართველი პარტიისადმი", — განაცხადა კახა კოჟორიძემ.

გუშინ, ლელოს ერთ-ერთმა ლიდერმა, ანა ნაცვლიშვილმა მოითხოვა, ჩანაწერების სავარაუდო ფიგურანტებმა, პრემიერმინისტრმა ირაკლი ღარიბაშვილმა და სახელმწიფო დაცვის სპეციალური სამსახურის უფროსმა, ანზორ ჩუბინიძემ თანამდებობები დატოვონ. ნაცვლიშვილის თქმით, მათ აქვთ ყველა ფორმალური და არაფორმალური ბერკეტი გამოძიებას ხელი შეუშალონ.

ლელოში, ასევე, აცხადებენ, რომ მათთვის მიუღებელია ირაკლი ღარიბაშვილთან და მისი ჩართულობით ნებისმიერ ფორმატში მონაწილეობა.

TV პირველმა 6 მარტს გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ამ დროისთვის უცნობია, ავთენტურია თუ არა ჩანაწერები. ქართული ოცნების რამდენიმე ლიდერმა ჯერ კიდევ გადაცემის ანონსის შემდეგ თქვა, რომ ეს არის "ფაბრიკაცია" და "შეკოწიწებული". თავდაპირველად ჩანაწერის გაკეთების თარიღად მათ 2011 წელი დაასახელეს, შემდეგ კი — 2010. ჩანაწერებს ამ დრომდე არ გამოხმაურებია შინაგან საქმეთა სამინისტრო, მიუხედავად იმისა, რომ ისმის სავარაუდო ძალადობისა და მომავალი ძალადობის გეგმების შესახებ. კომენტარები არ გაუკეთებიათ არც პრემიერმინისტრ ღარიბაშვილსა და ბერა ივანიშვილს.

ჩანაწერების გავრცელებიდან უკვე 24 საათზე მეტი გავიდა, თუმცა პრემიერმინისტრი ამ ამბავს ჯერ კიდევ არ გამოხმაურებია.

გაიგეთ მეტი: