საქართველოს სახალხო დამცველის განცხადებით, შეიცავს თუ არა TV პირველის ანონსით გავრცელებული ჩანაწერები ინფორმაციას დანაშაულის შესახებ, ამ ჩანაწერების ნამდვილობის დადგენის შემდეგ უნდა შეფასდეს. ნინო ლომჯარია წერს, რომ ფარული ჩანაწერების უკანონო მოპოვება და ფაბრიკაცია წლებია პრობლემაა, მაგრამ არც ერთს მსგავს შემთხვევაში ეფექტური გამოძიება არ ჩატარებულა.

"წლებია საქართველოში ჩვეულ პრაქტიკად იქცა პოლიტიკური ოპონენტების თუ სხვა მხრივ არასასურველი ადამიანების მორალური განადგურების, მათი დისკრედიტაციის თუ საქმიანი რეპუტაციის შესალახად ფარული ჩანაწერების უკანონო მოპოვება თუ ფაბრიკაცია. მრავალი წელია საზოგადოება უშედეგოდ ითხოვს სამართალდამცავი ორგანოების მხრიდან დროულ და ობიექტურ გამოძიებას და შესაბამისი პირებისათვის პასუხისმგებლობის დაკისრებას. სამწუხაროდ, არც ერთ მსგავს შემთხვევაში არ ჩატარებულა ეფექტური გამოძიება, რაც საზოგადოების თითოეულ წევრს კიდევ უფრო დაუცველს ხდის მომავალში მსგავსი უკანონო და მიუღებელი პრაქტიკისგან.
ხაზგასმით უნდა აღინიშნოს, რომ დღევანდელ და სხვა შემთხვევებშიც, მხოლოდ ეფექტურად ჩატარებული გამოძიების, ჩანაწერების ავთენტურობისა და ნამდვილობის დადგენის შემდეგ შეიძლება შეფასდეს — შეიცავს თუ არა ჩანაწერები ინფორმაციას სავარაუდო დანაშაულებრივ ქმედებებთან დაკავშირებით, რაც ცალკე გამოძიების საგანს უნდა წარმოადგენდეს", — წერს ნინო ლომჯარია Facebook-ზე.

TV პირველმა გაავრცელა გადაცემის ანონსი, სადაც ისმის სავარაუდოდ, ირაკლი ღარიბაშვილისა და ბერა ივანიშვილის ხმა. ტელეკომპანიის ინფორმაციით, საუბარში მონაწილეობდა ანზორ ჩუბინიძეც. TV პირველი ამბობს, რომ ბერა ივანიშვილი ირაკლი ღარიბაშვილთან ერთად ადამიანების დასჯას უკვეთავს, რადგან მათი კომენტარები არ მოეწონა — "სკოლაში ჩაფსმული მივა იმენა დღეს", "ვერ წავიდოდა სკოლაში" ეს და სხვა ფრაზები ისმის ჩანაწერებში, რომელთა ავთენტურობა დადასტურებული არ არის.