სუს-ის განცხადებით, ერგნეთში, ინციდენტების პრევენციისა და მათზე რეაგირების მექანიზმის (IPRM) რიგით 98-ე შეხვედრაზე საოკუპაციო ძალების მიერ უკანონოდ დაკავებული საქართველოს მოქალაქეების გათავისუფლება "მკაცრად მოითხოვეს".

ოკუპირებული ცხინვალის ციხეში უკანონო პატიმრობაში ამჟამად ზაზა გახელაძე, გენადი ბესტაევი, ლაშა ხეთერელი და რამაზ ბეღელური იმყოფება.

"ამ ეტაპზე კონკრეტულ თარიღებზე საუბარი გაგვიჭირდება, მაგრამ ვიმედოვნებთ, რომ უახლოეს პერიოდში უკანონო პატიმრობაში მყოფი ყველა ჩვენი თანამოქალაქე თავიანთ სახლს დაუბრუნდება. ამ საკითხზე რაღაცის სანაცვლოდ საუბარი არ ყოფილა.

ჩორჩანას საკითხზეც დისკუსია შედგა და ჩვენი პოზიცია უცვლელია. მისი დანიშნულება არის უსაფრთხო გარემოს ხელშეწყობა", — აღნიშნა სახელმწიფო უსაფრთხოების სამსახურის წარმომადგენელმა, ირაკლი ანთაძემ.

მისივე თქმით, შეხვედრაზე, განსაკუთრებული ყურადღება დაეთმო, წინა შეხვედრიდან დღემდე ოკუპირებულ რეგიონსა და მის მიმდებარე ტერიტორიებზე დაფიქსირებულ ყველა მნიშვნელოვან ინციდენტს, რომელიც უკიდურესად აზიანებს უსაფრთხოების გარემოს, საფრთხეს უქმნის ადგილობრივი მკვიდრი მოსახლეობის პირად უსაფრთხოებას და საოკუპაციო ხაზის გასწვრივ თავისუფლად გადაადგილებას ზღუდავს.

ანთაძემ, ასევე, აღნიშნა, რომ შეხვედრაზე ახალგორელი აქტივისტის, თამარ მეარაყიშვილის დევნის საკითხი კიდევ ერთხელ დააყენეს.

სუს-ში, აგრეთვე, აცხადებენ, რომ აქცენტი არჩილ ტატუნაშვილის სასტიკ მკვლელობაზე, დავით ბაშარულის გაურკვეველ ვითარებაში გარდაცვალების საკითხსა და საოკუპაციო ხაზის გასწვრივ მიმდინარე უკანონო ე.წ. ბორდერიზაციის შემთხვევებზე გაკეთდა.

გორის მუნიციპალიტეტის სოფელ ერგნეთში, ინციდენტების პრევენციისა და მათზე
რეაგირების მექანიზმის (IPRM) რიგით 98-ე შეხვედრა, ხუთთვიანი პაუზის შემდეგ, დღეს 5 მარტს გაიმართა.

IPRM-ის მორიგი შეხვედრის წინასწარ თარიღად 2021 წლის 23 აპრილი განისაზღვრა.