ჯანდაცვის მინისტრის მოადგილის, თამარ გაბუნიას განცხადებით, Pfizer-ის ვაქცინა ქვეყანაში, წინასწარი ინფორმაციით, 22 მარტის კვირაში გამოიგზავნება. ამის შესახებ მან ჯანდაცვის სამინისტროში გამართულ ბრიფინგზე განაცხადა.

მისივე ინფორმაციით, Pfizer-ის სათაო ოფისთან მათ სატელეფონო კომუნიკაცია ჰქონდათ და დამატებითი ინფორმაცია მიაწოდეს.

"წინასწარი ინფორმაციით, ვაქცინის მოწოდება მოხდება 22 მარტის კვირაში, ამდენად, მარტის ბოლომდე ვაქცინაციის პროგრამა Pfizer-ის მიმართულებით დაიწყება", — განაცხადა გაბუნიამ.

საქართველოში ვაქცინა ჯერ კიდევ თებერვალში უნდა შემოსულიყო, თუმცა როგორც ჯანდაცვის სამინისტროში აცხადებენ, ეს გარკვეული მიზეზებით გადაიდო.

ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი.

ჯანდაცვის მინისტრის მოადგილე, თამარ გაბუნია ამბობდა, რომ COVAX პლატფორმის ფარგლებში, დაახლოებით, მარტის დასაწყისში AstraZeneca-ს 315 000 დოზაც შემოვიდოდა. გარდა ამისა, პირდაპირი მოლაპარაკებების საფუძველზე საქართველო 150 ათას დოზა ვაქცინას მიიღებდა.

Covax-ის ცნობით, თებერვლის ბოლოს ნაადრევი გზავნილები იმ ქვეყნებში განხორციელდა, რომლებმაც კრიტერიუმები უკვე დააკმაყოფილეს.

გაიგეთ მეტი: