ნამახვანჰესის კასკადის მშენებლობასთან დაკავშირებით ცაგერში მოსახლეობასთან გამართული შეხვედრა დასრულდა. ეკონომიკის მინისტრის, ნათია თურნავას განცხადებით, ეს შეხვედრები მთავრობისთვის გზამკვლევია.

"ბევრი რამის გათვალისწინება დღესაც შეიძლება და ეს შეხვედრა ნამდვილად არ ყოფილა შეხვედრა შეხვედრისთვის. ეს შეხვედრა არის გზამკვლევი ჩვენთვის, მთავრობისთვის, რომ ბევრი რამ, ჯერ კიდევ საწყის ეტაპზეა პროექტი, გავითვალისწინოთ", — აღნიშნა მინისტრმა.

ცაგერში შეხვედრაზე მოსახლეობამ ნამახვანჰესის მშენებლობის გამო უკმაყოფილება გამოთქვა. თავდაპირველად ცნობილი იყო, რომ შეხვედრა დახურული ფორმატის იქნებოდა, რის გამოც მასზე დასწრება რიონის ხეობის მცველებმა უარი თქვეს. თუმცა მოგვიანებით ცნობილი გახდა, რომ შეხვედრაზე მედიას შეუშვებდნენ.

როგორც ეკონომიკის მინისტრი ამბობს, ისინი რიონის ხეობის მცველებთან ჩავლენ და მათთვის მისაღებ ფორმატს შესთავაზებენ.

"პირველ რიგში, გვსურს მათ ვუთხრათ, რომ ნამდვილად, ჩვენი დიდი სურვილია ჩვენს შორის საუბარი გაიმართოს. ვწუხვართ, რომ ფორმატის გამო არ ისურვეს ცაგერში ჩამოსვლა და გვესმის მათი, რომ ღია ფორმატია აუცილებელი. შესაბამისად, თქვენც ხედავთ, რომ მივიღეთ გადაწყვეტილება, მედია სრულად დასწრებოდა შეხვედრას. ახლა მივდივართ ადგილზე, კარვებთან, სადაც ადამიანები ამდენი დღეა, თავიანთ პროტესტს გამოხატავენ და ალბათ შევთანხმდებით შემდეგი შეხვედრის ფორმატზე, უფრო, ასე ვთქვათ, მომზადებულ ვითარებაში, სადაც, ორივე მხრიდან იქნებიან ექსპერტებიც პრობლემურ საკითხებზე სასაუბროდ", — განაცხადა ეკონომიკის მინისტრმა.

რიონის ხეობაში ნამახვანჰესის მშენებლობას ეწინააღმდეგებიან როგორც ადგილობრივები, ისე არასამთავრობო ორგანიზაციები.

ნამახვანიჰესის კასკადი მდინარე რიონზე უნდა აშენდეს და ორ ჰესს მოიცავს, ქვემო და ზემო ნამახვანჰესს. ორივე ჰესი ერთად 433 მგვტ სიმძლავრის იქნება. პროექტი 750 მილიონი აშშ დოლარის ღირებულებისაა და იგეგმება, რომ კასკადი ექსპლუატაციაში 2025-2026 წელს შევიდეს. პროექტს კომპანია ენკა რინიუებლზ ახორციელებს.

ადგილობრივი მოსახლეობა სოფელ ჟონეთში ოთხი თვეა ჰესის მშენებლობას აპროტესტებს. ისინი ხეობიდან კომპანიის გასვლასა და მშენებლობის შეჩერებას მოითხოვენ. ამავე დროს, ქართულ ოცნებაში მიაჩნიათ, რომ ადგილობრივი მოსახლეობისთვის არაა ნაჩვენები ნამახვანჰესის სიკეთეები და მეტი კომუნიკაციაა საჭირო.

ადამიანის უფლებების სწავლებისა და მონიტორინგის ცენტრის (EMC) განცხადებით, ნამახვანჰესის ხელშეკრულებით მნიშვნელოვანი სახელმწიფო ინტერესები დათმობილია კერძო კომპანიის სასარგებლოდ. როგორც ორგანიზაციაში ამბობენ, პროექტს არათუ ვერ ექნება ის წვლილი ქვეყნის ენერგოუსაფრთხოებაში, რაზეც მთავრობა მიუთითებს, არამედ შეთანხმება ქვეყნის ბიუჯეტისთვის მძიმე და განუსაზღვრელ ფისკალურ ტვირთებს ითვალისწინებს.

EMC-ს პასუხად, ეკონომიკის სამინისტრო აცხადებს, რომ აღნიშნული დასკვნა სპეკულატიური და დილეტანტურია.