თბილისში საპროტესტო მსვლელობა "სანამ რეჟიმი ყველას გაგვყინავს — გაყინე სესხი!" გაიმართა. მსვლელობის მონაწილეები კომერციული ბანკებისგან მოითხოვენ, გადავადდეს იმ პირების საბანკო ვალდებულებები, რომლებიც საპროტესტო გაფიცვებში მონაწილეობენ, ან მონაწილეობას აპირებენ, რადგან ხშირად დამაბრკოლებელი ფაქტორი სწორედ სასესხო ვალდებულებებია.

"მთავარი მოთხოვნა არის სესხების დაპაუზება ან გაყინვა იმ ადამიანებისთვის, რომლებიც არიან უკვე გაფიცული ან ვერ ახერხებენ გაფიცვას მათი სასესხო ვალდებულებების გამო. ეს მოთხოვნა პირდაპირ ბმაშია და ამოიზარდა დიდი საპროტესტო ტალღიდან, რომელიც ახლა საქართველოში არსებობს და გრძელდება, რადგან ამ პროტესტის დროს გამოიკვეთა, რომ ერთ-ერთი ყველაზე მძლავრი მექანიზმი, რომლითაც შეიძლება, რომ მოსახლეობამ გააძლიეროს წნეხი "ქართულ ოცნებაზე", შეიძლება იყოს გაფიცვა. თუმცა, ამავდროულად აღმოჩნდა, რომ გაფიცვა ხელს უშლის ადამიანების დავალიანების ძალიან მაღალი დონე და მათი სასესხო ვალდებულებები — აქედან გამომდინარე, ბევრი სექტორი და ბევრი პროფესიული ჯგუფი ვერ ახერხებს გაფიცვას. შესაბამისად, კომერციული ბანკების მხრიდან ამ ნაბიჯის გადადგმა იქნება მნიშვნელოვანი, რაც გააძლიერებს პროტესტს", — აცხადებს პოლიტეკონომისტი ია ერაძე მარშიდან "სანამ რეჟიმი ყველას გაგვყინავს — გაყინე სესხი".

"სანამ რეჟიმი ყველას გაგვყინავს — გაყინე სესხი!" — ამ ლოზუნგით გამართული ეს რიგით მეორე მსვლელობაა. პირველი მარში თიბისი და ლიბერთი ბანკებთან მოეწყო.