სარეაბილიტაციო-განმავითარებელი ცენტრ "კესანეს" ქცევითი თერაპევტები ლიკო სპანდერაშვილისა და სალომე მჭედლიძე აცხადებენ, რომ ისინი სამსახურიდან პოლიტიკური ნიშნით გაათავისუფლეს.

ლიკო სპანდერაშვილი სოციალურ ქსელში წერს, რომ ის და სალომე მჭედლიძე ღიად აფიქსირებდნენ აზრებს პოლიტიკასთან დაკავშირებით და სწორედ ამის გამო გაათავისუფლეს სამსახურიდან.

"ახლა ხელები მიკანკალებს ამ პოსტის წერის დროს…

მოკლედ, მოგეხსენებათ, მე ვარ ქცევის თერაპევტი სარეაბილიტაციო-განმავითარებელი ცენტრი "კესანეში".

მე და სალომე მჭედლიძე ღიად ვაფიქსირებდით ჩვენს აზრებს პოლიტიკასთან დაკავშირებით.

რა თქმა უნდა, ორივე განთავისუფლებულები ვართ სამსახურიდან ვითომ იმის გამო, რომ ხელშეკრულება დაგვიმთავრდა.

მე და სალომე, რა თქმა უნდა, ვართ ამ საძაგელი სისტემის მსხვერპლი და პოლიტიკური ნიშნით ვართ გათავისუფლებული სამსახურიდან.

ჩვენ ბრძოლა დიდი ხნის დაწყებული გვაქვს ამ ჯალათების წინააღმდეგ და, რა თქმა უნდა, ვაგრძელებთ!!!!!, — წერს სოციალურ ქსელში სარეაბილიტაციო-განმავითარებელი ცენტრ "კესანეს" უკვე ყოფილი თერაპევტი ლიკო სპანდერაშვილი.

სალომე მჭედლიძე წერს, რომ ქვეყანაში "პოლიტიკური ნიშნით შემცირებები დაიწყო".

"დღეს ვიგებ, რომ ესე ყოველგვარი მიზეზის გარეშე მიშვებენ ორივე პროგრამიდან, მიზეზი რომ ვიკითხე, ხელშეკრულება დაგიმთავრდაო და აღარ გიგრძელებთო...

სამართლებრივად სწორი დრო შეარჩიეს, რომ არ ეთქვათ პოლიტიკური ნიშნით გიშვებთო!

ამიტომ ვიძახდი, ყოველთვის და ვიტყვი, რომ ეს არის რეპრესიები და გონს უნდა მოეგოთ ყველანი რამდენს ბედავენ ეს არაადამიანები!", — წერს სალომე მჭედლიძე სოციალურ ქსელში.