ნაციონალური მოძრაობის ერთ-ერთი ლიდერის, ხატია დეკანოიძის განცხადებით, პრემიერმინისტრ ირაკლი ღარიბაშვილის რიტორიკა საერთაშორისო პარტნიორების მოლოდინის ადეკვატური არ არის.

"ის რიტორიკა, რომელიც დღეს ჰქონდა ღარიბაშვილს არ არის ადეკვატური იმ მოლოდინის, რომელიც საერთაშორისო პარტნიორებს აქვს, რაც აზიანებს არა მხოლოდ ქართულ ოცნებას, არამედ ქვეყანას. რა თქმა უნდა, ეს არ არის პოლიტიკური კრიზისის განმუხტვის გზა", — განაცხადა დეკანოიძემ ლეიბორისტული პარტიის ოფისში საკოორდინაციო საკითხებზე ოპოზიციური პარტიების შეხვედრის დაწყებამდე.

მისივე თქმით, ოპოზიციის მოთხოვნები კვლავ უცვლელია და ისინი პირველ რიგში, ნაციონალური მოძრაობის თავმჯდომარის, ნიკა მელიას, გიორგი რურუას პატიმრობიდან გათავისუფლებასა და ვადამდელი საპარლამენტო არჩევნების დანიშვნას მოითხოვენ.

ირაკლი ღარიბაშვილმა 2 მარტს განაცხადა, რომ პარლამენტის პიკეტირების მცდელობით ოპოზიციამ არათანმიმდევრული ნაბიჯები გადადგა. როგორც პრემიერი ამტკიცებს, ეს "ანტისახელმწიფოებრივი და უკანონო" ქმედებები ქვეყნის ინტერესებს არ ემსახურება.