რუსული ავიაციის იერიშებს ჩრდილოეთ სირიაში თურქი ჯარისკაცები ემსხვერპლნენ. თურქეთის ხელისუფლების განცხადებით, რუსეთის ბომბდამშენებმა შეცდომით დაბომბეს შენობა, რომელშიც თურქი ჯარისკაცები იმყოფებოდნენ. დაღუპულია სამი სამხედრო, 15 კი – დაშავდა. ინფორმაციას BBC ავრცელებს.

ინციდენტი სირიის ჩრდილოეთით, ქალაქ ალ–ბაბში მოხდა. აღნიშნულ ქალაქში ინტენსიური ბრძოლები მიმდინარეობს სირიელ ოპოზიციასა და ტერორისტულ ორგანიზაცია ისლამურ სახელმწიფოს შორის. სირიელ მებრძოლებს ზურგს თურქეთის სამხედრო ძალა უმაგრებს. თურქეთის ხელისუფლების ცნობით, რუსულ ავიაციას იერიშის მიტანა სურდა ე.წ. ისლამური სახელმწიფოს ობიექტზე, თუმცა შეცდომა მოხდა.

ვლადიმერ პუტინმა უკვე გამოაქვეყნა სამძიმრის წერილი და შემთხვევას "ტრაგიკული ინციდენტი" უწოდა. ის უკვე ესაუბრა თურქეთის პრეზიდენტს. როგორც რია ნოვოსტი წერს, მხარეებმა ინციდენტის მიზეზად კომუნიკაციის ნაკლებობა დაასახელეს.