"შინაგან საქმეთა სამინისტრომ ყველაფერი გააკეთა რომ ამ ადამიანის უსაფრთხოება და ინტერესები დაცული ყოფილიყო, როცა ის იყო საქართველოში" - ქართული ოცნების ერთ-ერთმა ლიდერმა არჩილ თალაკვაძემ, დღეს 9 თებერვალს გამართულ პლენარულ სხდომაზე საპარლამენტო უმცირესობის წევრების კითხვებს უპასუხა გია ცერცვაძის შესახებ.

თალაკვაძემ განაცხადა, რომ ხელისუფლება გია ცერცვაძეს საზღვარზე არ დააკავებდა და მისივე თქმით, ასე არც მომავალში მოიქცევა:

"გია ცერცვაძე არ დავაკავეთ და არც დავაკავებთ, რადგან ის არ იყო ძებნილი საქართველოს სამართალდამცავი ორგანოების მხრიდან. ინტერპოლი ეძებდა, მაგრამ არცერთი თავმოყვარე ქვეყანა საკუთარ მოქალაქეს არ აკავებს. შოკირებული ვარ, რადგან დღეს ორჯერ მოვისმინე და როგორ არ შეგრცხვათ ტრიბუნიდან ამის თქმა? თქვენ ფაქტობრივად გაბრაზებული ხართ იმაზე, თუ საქართველოს სახელმწიფომ როგორ არ დააკავა ცერცვაძეო, როდესაც ის გადიოდა საზღვარზე. როგორ არ დააკავაო?! - ასე თქვით ზუსტად. მე ვიცოდი, რომ თქვენ ეს გინდოდათ, მე ვიცოდი, რომ თქვენ ელოდით, რომ საქართველო დააკავებდა თავის მოქალაქეს საზღვარზე, რადგან ჩვენ ამას არ გავაკეთებთ არასოდეს, რადგან ჩვენ ვართ თავმოყვარე სახელმწიფოს ხელისუფლება".

თალაკვაძის თქმით, საგარეო საქმეთა სამინისტრომ ყველაფერი გააკეთა რომ გია ცერცვაძე უმოკლეს დროში გაეთავისუფლებინათ:

"ჩვენ გავაკეთეთ პირველი განცხადებები რომ იგი უმოკლეს დროში გათავისუფლდებოდა. თუ თქვენ მიგიძღვით წვლილი ამაში, გასაგებია, მაგრამ უნდა თქვათ როგორ მოახერხეთ ეს ყველაფერი, იმიტომ რომ საგარეომ ძალიან ბევრი გააკეთა მის დასახმარებლად".