სამოქალაქო აქტივისტებმა ევროპული საბჭოს პრეზიდენტს, შარლ მიშელს წერილი მისწერეს, სადაც საუბრობენ ქვეყანაში შეკრებისა და გამოხატვის თავისუფლების შეზღუდვაზე, ასევე პოლიტიზებულ სასამართლოსა და აქტივისტებისთვის ხელის შეშლაზე. ისინი მიშელს სთხოვენ, გამოიყენოს მის ხელთ არსებული ყველა ბერკეტი სამოქალაქო აქტივისტების წინააღმდეგ მიმართული რეპრესიებისთვის ხელის შესაშლელად.

"2019 წლის 20 ივნისიდან დღემდე პოლიციამ დააკავა ასობით სამოქალაქო აქტივისტი მშვიდობიანი პროტესტის დროს. ბოლო ერთი თვის განმავლობაში პოლიცია თითქმის ყოველ დღე აკავებდა სამოქალაქო აქტივისტებს შეკრების უფლებისა და საპროტესტო კარვების დადგმისთვის

მთავრობის რეპრესიები სამოქალაქო აქტივისტების მიმართ ხორციელდება პოლიტიზებული სასამართლოს დახმარებით", — ვკითხულობთ აქტივისტების წერილში.

წერილში, ასევე, ვკითხულობთ, რომ ქართული ოცნება მიზანმიმართულად იბრძვის სამოქალაქო აქტივისტების წინააღმდეგ და არ აკავებს კრიმინალებს, რომლებიც მათ გამოხატვის თავისუფლებაში უშლიან ხელს.

"ჩვენ გვჯერა, რომ თავდამსხმელები, პოლიცია, მმართველი პარტია, სასამართლო და პროკურატურა მოქმედებენ კოორდინირებულად სამოქალაქო აქტივისტების წინააღმდეგ.

გთხოვთ, გამოიყენეთ თქვენს ხელთ არსებული შესაძლებლობები საქართველოში რეპრესიებისთვს ხელის შესაშლელად", — ვკითხულობთ წერილში.

სამოქალაქო აქტივისტის, ირაკლი ფავლენიშვილის თქმით, მათი მიზანია საერთაშორისო პარტნიორები დაეხმარონ კონსტიტუციური უფლებების რეალიზებაში.

"ჩვენი მოთხოვნა არის მარტივი — შეწყდეს პოლიტიკური დევნა მშვიდობიანი პროტესტანტების. იმიტომ, რომ ჩვენ აქციებზე გვაკავებენ მაშინ, როდესაც არაფერს არ ვაშავებთ რეალურად და ამის ძალიან ბევრი მტკიცებულება გვაქვს. ასე ექცევიან არა ევროპაში პროტესტანტებს, არამედ რუსეთში და სხვა ავტორიტარულ ქვეყნებში. ამიტომაც, ჩვენ კიდევ ერთხელ მოვუწოდებთ ჩვენს საერთაშორისო პარტნირებს, დაგვეხმარონ ჩვენი კონსტიტუციური უფლების რეალიზებაში", — განაცხადა ფავლენიშვილმა.

წერილის ავტორები არიან:

  • მოძრაობა საქართველოსთვის;
  • მოძრაობა სირცხვილია;
  • მოძრაობა შეცვალე;
  • სამოქალაქო პლატფორმა გხედავ;
  • მოძრაობა მე მიყვარს ბათუმი;
  • მოძრაობა იმოქმედე
  • სამოქალაქო მოძრაობა — დემოკრატიული საქართველოსთვის;

ევროპული საბჭოს პრეზიდენტი, შარლ მიშელი საქართველოში გუშინ ჩამოვიდა და დღეს, დილიდან ოფიციალურ შეხვედრებს მართავს. იგი უკვე შეხვდა საქართველოს პრეზიდენტს, სალომე ზურაბიშვილს და იმყოფებოდა საოკუპაციო ხაზთან. შარლ მიშელი შეხვდა ოპოზიციონერ ლიდერებსაც.

გაიგეთ მეტი: