"ვერ დავადასტურებ ვერანაირ პოზიციურ ცვლილებას ბატონ ამირანთან დაკავშირებით", — ასე უპასუხა ჯანდაცვის მინისტრის მოადგილემ, თამარ გაბუნიამ კითხვას NCDC-ის დირექტორის, ამირან გამყრელიძის შესაძლო გადაყენების შესახებ. მისივე თქმით, გამყრელიძესთან ძალიან საქმიანი და კონსტურქციული ურთიერთობა აქვთ და ვერც დაპირისპირებაზე ინფორმაციას დაადასტურებს.

"ბატონი ამირანი ხელმძღვანელობს დაავადებათა კონტროლის ცენტრს, აქტიურად არის ჩართული ვაქცინაციის პროცესში. ჩვენ დღეს დილით გვქონდა შეხვედრა ბატონ პრემიერთან იმისთვის, რომ კიდევ ერთხელ დავგეგმოთ და გავიაროთ ყველა შესაძლო მექანიზმი ვაქცინების ქვეყანაში შემოტანის და ვაქცინაციის პროგრამის აქსელერაციისთვის და რა თქმა უნდა, მე ვერ დავადასტურებ ვერანაირ პოზიციურ ცვლილებას ბატონ ამირანთან დაკავშირებით", — განაცხადა მან.

დღეს, პირველ მარტს სტრატეგია აღმაშენებლის ერთ-ერთმა ლიდერმა, სერგო ჩიხლაძემ განაცხადა, რომ ამირან გამყრელიძის პენსიაზე გაშვების საკითხი განიხილება. მისი თქმით, ზუსტად არ იცის გადაწყვეტილება უკვე მიღებულია თუ არა, მაგრამ ამის შესახებ ინფორმაცია, დაახლოებით, 1 კვირაა აქვთ.

ამ ინფორმაციის დასაზუსტებლად On.ge-მ ამირან გამყრელიძეს მიმართა. პასუხად მან მხოლოდ ეს თქვა: "ვაგრძელებ მუშაობას ჩვეულ რეჟიმში".