ბოდბელი მთავარეპისკოპოსი იაკობი ამბობს, რომ ნაციონალური მოძრაობის ლიდერისთვის, ნიკა მელიასთვის პარლამენტში იმუნიტეტი არ უნდა მოეხსნათ. გარდა ამისა, იგი ამბობს, რომ მელია უცხოელებისთვის ვერც "განდი და ვერც მანდელა ვერ გახდა".

პროკურატურას არ უნდა შეეტანა პარლამენტში და არც 88 კაცს არ უნდა მიეცა ხმა. სინოდშია ხოლმე განსხვავებული აზრი და მარტო პარტიაში ყველას ერთი აზრი როგორ უნდა ჰქონდეს. მერე სასამართლო იყო. გარედან როცა უყურებ პროცესებს ცოტა ცუდად ჩანს. მოხდა ისე, ვერ დამიჭერთო და არ გაგატანთო. მივიდნენ და ვნახე, ზოგიერთი ოპოზიციის ლიდერი გარბოდა იქიდან და შეატოვეს მელია. წამოვიდა ამერიკიდან და ევროპიდან სამართლიანი საყვედურები, მძიმე განცხადებები. რამდენ ხანს გაგრძელდება? ახლა პროკურატურამ თქვა, ეს ჩემთვის გაურკვეველი იყო, თუ გადაიხდის გირაოს, გავუშვებთო. ამას მსოფლიო ხომ უყურებს. თუ არ გადაიხდის, როგორ შეხედავენ, ლიდერად შეხედავენ? ხომ არ შეხედავენ ლიდერად. ასე რომ ნიკას დაჭერით, თუ მანამდე აგორდა რაღაცა, როგორც სიტუაციამ გვიჩვენა [მელია] ვერც განდი გახდა უცხოელებისთვის, ვერც მანდელა და მით უმეტეს ვერც სერვანტესი", — თქვა მთავარეპისკოპოსმა ჟურნალისტებთან.

მან კიდევ ერთხელ შესთავაზა პოლიტიკურ პარტიებს ეკლესიაში მისვლა და "დიდი შერიგების" მოწყობა.

23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

მელიას დაკავებას საქართველოს მეგობარ ქვეყნებსა თუ პარტნიორ ორგანიზაციებში კრიტიკული შეფასებები მოჰყვა. აშშ-ის პოზიცია საქართველოში ქვეყნის საელჩომ გამოხატა და თქვა, რომ ევროატლანტიკურ სახელმწიფოთა ოჯახში უფრო ძლიერი დემოკრატიისკენ მიმავალ გზაზე უკან დაიხია. შეშფოთება გამოთქვა ამერიკელმა კონგრესმენმა, საქართველოს მეგობართა ჯგუფის თანათავმჯდომარე ადამ კინზინგერმაც და მომხდარს დარბევა უწოდა. ევროკავშირის ელჩის, კარლ ჰარცელის განცხადებით კი, ქვეყანაში არსებულ ვითარებაზე პასუხისმგებლობა ყველა მხარემ უნდა აიღოს. მისი თქმით, საქართველოში პოლიტიკური კრიზისი ღრმავდება. ევროპარლამენტარ მარკეტა გრეგოროვას განცხადებით კი, ნაციონალური მოძრაობის თავმჯდომარე, ნიკა მელიას დაპატიმრება დემოკრატიის უკუსვლის აისბერგის მხოლოდ წვერია.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.