თუ დილას ფინჯანი ჩაით ხელში იწყებ, მარტო ნამდვილად არ ხარ. ჩაის არომატი უამრავი ადამიანის ყოველდღიურობის განუყოფელი ნაწილია, ამიტომ ხშირად გვავიწყდება, რომ ჩაი მსოფლიოში ერთ-ერთი ყველაზე პოპულარული სასმელია, რომელსაც საუცხოო გემოს გარდა, ხანგრძლივი ისტორია და უამრავი სამკურნალო თვისებაც აქვს. თუ ჩაის არომატით ტკბობა და მისი სასარგებლო თვისებების საკუთარ თავზე გამოცდა გინდა, ჩაიმანიას მაღაზიას ან ვებგვერდს აუცილებლად უნდა ესტუმრო, რადგან აქ საყვარელ გემოს ჩაის ნებისმიერი მოყვარული აღმოაჩენს.

სანამ წყალი ადუღდება და ოთახი ჩაის სურნელში ჩაიძირება, მოასწარი შენი საყვარელი სასმელის შესახებ 10 საინტერესო ფაქტის წაკითხვა.

1. ჩაის ჩინეთში ჩვენს წელთაღრიცხვამდე მე-3 ათასწლეულში მიირთმევდნენ

ერთ-ერთი ლეგენდის თანახმად, როდესაც ჩინეთის იმპერატორი შენ ნანგი ბაღში წყალს ადუღებდა, ჭურჭელში შემთხვევით ჩაის ფოთოლი ჩავარდა. იმპერატორს სასმელი ძალიან მოეწონა და გადაწყვიტა, უცნაური მცენარე კარგად შეესწავლა. ამის შემდეგ მან ჩაის სამკურნალო თვისებებიც აღმოაჩინა.

2. ჩაის ერთჯერადი პაკეტები მე-20 საუკუნეში გავრცელდა

ერთჯერადი პაკეტების დამზადების იდეა მე-20 საუკუნის დასაწყისში აქტიურად განიხილებოდა. ჩაის პაკეტების გავრცელება ამერიკელი ბიზნესმენის, ტომას სალივანის სახელს უკავშირდება. მან თავის კლიენტებს ჩაი გასასინჯად სწორედ ერთჯერად შეფუთვებში გაუგზავნა. ამ ხერხმა პოპულარულობა მალევე მოიპოვა და ჩაის სმის კულტურის განუყოფელი ნაწილიც გახდა.

3. შავი და მწვანე ჩაი ერთი და იმავე ფოთლებისგან მზადდება

მიუხედავად იმისა, რომ მწვანე და შავ ჩაის ერთმანეთისგან განსხვავებული გემო აქვს, ყველა სახეობის ჩაის დასამზადებლად ერთი და იგივე ფოთლები, სახელად "კამელია სინენსის" გამოიყენება. განსხვავება ფოთლების დამუშავების წესში — მათი ფერმენტაციის ხარისხშია.

4. მწვანე ჩაი გულ-სისხლძარღვთა სისტემის ერთგული მეგობარია

მწვანე ჩაი ამცირებს ორგანიზმში ე.წ. ცუდი ქოლესტერინის დონეს. ამასთან, არეგულირებს წნევას და შესაძლოა, გულის დაავადებათა რისკიც შეამციროს, შესაბამისად მწვანე ჩაის შეყვარება შენს გულს განსაკუთრებით ესიამოვნება.

5. მწვანე ჩაი აუმჯობესებს მეტაბოლიზმს

თუ წონის დაკლებით ოდესმე დაინტერესებულხარ, მაშინ მწვანე ჩაის, ალბათ, კარგად იცნობ. მიჩნეულია, რომ მწვანე ჩაი აუმჯობესებს მეტაბოლიზმს, რაც, თავის მხრივ, წონის დაკლებასაც უწყობს ხელს.

6. გვირილის ჩაი — სტრესისა და უძილობის წამალი

თუ ოდესმე უძილობის, გადატვირთული რეჟიმისა თუ სტრესის გამო დაგიჩივლია, გვირილის ჩაის დალევას, ალბათ, ერთი ადამიანი მაინც შემოგთავაზებდა. გვირილის ჩაის შემადგენლობაში შედის აპიგენინი-ანტიოქსიდანტი, რომელიც დადებითად მოქმედებს ნერვულ რეცეპტორებზე, ამცირებს სტრესს და ჩაძინებაშიც გეხმარება.

7. თეთრი ჩაი შენს კბილებზე იზრუნებს

მიუხედავად იმისა, რომ თეთრი ჩაი ჩაის ძირითადი სახეობებიდან ყველაზე ნაკლებადაა გავრცელებული, მისი შეძენა მაღაზიაში მაინც შეგიძლია. თეთრი ჩაის შემადგენლობაში ფთორიდი, ტანინები და კატექინი შედის. აღნიშნული შემადგენლობის წყალობით, თეთრი ჩაი კბილების სიმაგრეს უწყობს ხელს და შესაძლოა, შაქრისა და მჟავისგან მათი დაცვაც უზრუნველყოს.

8. მეცადინეობისას ან მუშაობისას შავი ჩაი შენი ერთგული მეგობარი იქნება

თუ სამუშაო მაგიდასთან მჯდომს ყურადღების მოკრება და მომდევნო გვერდის წაკითხვა გიჭირს, სჯობს შავი ჩაი მოიმზადო. შავი ჩაი კოფეინს შეიცავს, რომელიც ყურადღების მოკრებაში დაგეხმარება. შავი ჩაი აუმჯობესებს ახალი ინფორმაციის მიღებასა და ათვისებას, გავსებს ენერგიითა და მუშაობის გაგრძელების ენთუზიაზმით.

9.მატჩა — შენი უჯრედების მამაცი მცველი

მატჩა ყველაზე მაღალხარისხიანი მწვანე ჩაის ფხვნილია, რომელსაც უნიკალური თვისებები გააჩნია. ის ჩაის ფოთოლში არსებულ საკვები ნივთიერებების ერთგვარი საბადოა. აღსანიშნავია, რომ მატჩა დიდი რაოდენობით ანტიოქსიდანტებს შეიცავს და ჩვენი უჯრედების მამაცი მცველია.

10. ჩაის მომზადების წესი სახეობების მიხედვით განსხვავებულია

ჩაის მომზადების უნიკალური მეთოდი მდუღარე წყლის დასხმა როდია: ჩაის თითოეული სახეობის მოსამზადებლად წყლის განსხვავებული ტემპერატურაა საჭირო. მაგალითად, თეთრი ჩაის დასაყენებლად 65-75°, ხილის ჩაის მოსამზადებლად კი — 100°-ია საჭირო. მწვანე ჩაის მოსამზადებლად ოპტიმალურია 75-85°, შავი ჩაის შემთხვევაში კი — 85-95°.

თუ ამ სტატიამ ჩაის დალევა მოგანდომა, დროა, ჩაიმანიას მაღაზიას ან ვებგვერდს ესტუმრო. ჩაიმანია ჩაის, ყავის, ჭურჭლისა და ტკბილეულის მაღაზიათა ქსელია, რომელიც ხარისხიანი პროდუქციის გარდა, ძველი ინგლისური სტილითაც მოგხიბლავს. მაღაზიებში 100-ზე მეტი სახეობის უმაღლესი ხარისხის ჩაი და ჩაისებრი სასმელები მთელი მსოფლიოდანაა წარმოდგენილი. გარდა ამისა, ჩაიმანია ქართული პროდუქციის პოპულარიზაციასაც უწყობს ხელს და სტარტაპებს მაღაზიათა ქსელში თავიანთი ნაწარმის წარდგენის შესაძლებლობასაც აძლევს. ჩაიმანია დაგეხმარება, მსოფლიოსა და მშობლიური არომატები სახლიდან გაუსვლელად, საკუთარ ფინჯანში აღმოაჩინო.