თბილისის მერიამ ივანე ჯავახიშვილის სახელობის თბილისის სახელმწიფო უნივერსიტეტს საჩუქრად ინოვაციური სამრეწველო ლაბორატორია -ფაბლაბი გადასცა. ეს თსუ-ს 99 წლის იუბილესთან დაკავშირებით თბილისის მერის საჩუქარია. მერიის პრესსამსახურის ინფორმაციით, ლაბორატორია თბილისის სახელმწიფო უნივერსიტეტის მაღლივ კორპუსში, თბილისის მერიის ერთ-ერთი პროექტის ფარგლებში, 2015 წელს გაიხსნა.

„იყო უნივერსიტეტელი, რომელსაც ერთი საუკუნე უსრულდება, განსაკუთრებული პასუხისმგებლობა და ღირსებაა, რომელსაც სათანადოდ უნდა გავუფრთხილდეთ. ამასთან, რადგან იუბილეზე საჩუქრებით მოდიან, თბილისის მერიის სახელით მე დღეს უნივერსიტეტს გადავცემ ძალიან საინტერესო და მნიშვნელოვან საჩუქარს,“ - აღნიშნა თბილისის მერმა, დავით ნარმანიამ.

მერიის პრესსამსახურის ინფორმაციით, უნივერსიტეტის საიუბილეო ღონისძიებას ნარმანიასთან ერთად თბილისის საკრებულოს თავმჯდომარე - გიორგი ალიბეგაშვილი, საქართველოს პრეზიდენტი - გიორგი მარგველაშვილი, განათლების და მეცნიერების მინისტრი - ალექსანდრე ჯეჯელავა, მთავრობის წევრები, პროფესორები, სტუდენტები და სხვა სტუმრები ესწრებოდნენ.