სკოლის, უნივერსიტეტისა თუ სამსახურის გასაცდენად მიზეზების მოფიქრება ბევრისთვის უცხო, ალბათ, არაა. პასუხისმგებლობებისგან თავის დასაძვრენად ხშირად მარტივ ტყუილებს ვიგონებთ, თუმცა 19 წლის არიზონელმა ბრენდონ სოულსმა ყველა მოლოდინს გადააჭარბა: არიზონას სამართალდამცავების მიხედვით, ბრენდონმა სამსახურისთვის თავის არიდების მიზნით, საკუთარი გატაცება გაითამაშა, რის გამოც ცრუ შეტყობინებაში ედება ბრალი.

10 თებერვალს სამართალდამცავებთან დაშავებული კაცის შესახებ შეტყობინება შემოვიდა. პოლიციელებმა ბრენდონ სოულსი გაკოჭილი და პირაკრული იპოვეს. სოულსმა მათ უთხრა, რომ სახლთან ახლოს ორი ნიღბიანი მამაკაცი დაესხა თავს. დარტყმის შემდეგ სოულსმა გონება დაკარგა, ნიღბიანმა მამაკაცებმა იგი გაიტაცეს და იმ ადგილას დატოვეს, სადაც შემდგომ პოლიციელებმა სოულსი იპოვეს. სოულსმა გატაცების მიზეზად უდაბნოში მამამისის მიერ დამალული ფული დაასახელა.

გამომძიებლები სოულსის ჩვენებას რამდენიმე დღის განმავლობაში ამოწმებდნენ. მათ გამოიკვლიეს ვიდეოჩანაწერი და სოულსის მიერ ნახსენები ადამიანებიც გამოკითხეს. სამედიცინო დასკვნის მიხედვით, სოულსს არც თავის არეში მიყენებული რაიმე სახის დაზიანება აღენიშნებოდა.

გამომძიებლებმა სოულსი რამდენჯერმე გამოკითხეს და, საბოლოოდ, დაასკვნეს, რომ მთელი ისტორია მისი გამოგონილია — უდაბნოში დამალული ფულის ჩათვლით. პოლიციის თქმით, სოულსმა საკუთარი გატაცების გათამაშება აღიარა.

ბრენდონ სოულსი მანქანის საბურავების მაღაზიაში მუშაობდა, სადაც მას საბურავების დაყენება და მაღაზიისთვის საჭირო ნაწილების ყიდვა ევალებოდა. მაღაზიის მენეჯერს მომხდართან დაკავშირებით კომენტარი არ გაუკეთებია, თუმცა ბრენდონ სოულსს ფეისბუქის ანგარიშზე მითითებული აქვს, რომ მაღაზიაში აღარ მუშაობს.

ჯერჯერობით უცნობია, რა სასჯელი ემუქრება ბრენდონ სოულსს.