POSTV-ში დაბრუნებული ლაშა ნაცვლიშვილი აცხადებს, რომ არხი "მაუწყებლობის საგანგებო რეჟიმზე გადადის!". ამის შესახებ ტელევიზიის ხელმძღვანელმა Facebook-ზე დაწერა. მისი თქმით, ჟურნალისტი, პირველ რიგში, ამ ქვეყნის მოქალაქეა და "აქვს უპირობო ვალდებულება, გააკეთოს მკაფიო არჩევანი კეთილსა და ბოროტს შორის".

"ნაციონალური სიმსივნე, რომელიც ოცი წელია, ჯიჯგნის ჩვენი სამშობლოს სხეულს, უნდა ამოიკვეთოს, ხოლო მისი მეტასტაზები — განეიტრალდეს, რათა დამშვიდდეს ქვეყანა და ნორმალური, დემოკრატიული განვითარების საშუალება მიეცეს. წილი ნაყარია! POSTV ამ ბრძოლაში წინა ხაზზე იქნება!", — აცხადებს ნაცვლიშვილი.

არხზე "დიდი პატივით, გეგმებითა და პასუხისმგებლობით" დაბრუნების შესახებ ნაცვლიშვილმა ინფორმაცია 21 თებერვალს გაავრცელა.

POSTV პროსამთავრობო, ანტიდასავლური მედიაა, რომლის ნაწილს შალვა რამიშვილი ფლობს. ხელისუფლებასთან აფილირებული ტელევიზია 2018 წლიდან მაუწყებლობს. ნაცვლიშვილი აქ მანამდეც მუშაობდა და აღმასრულებელი დირექტორის პოსტს იკავებდა, ასევე, იყო წილის მფლობელიც. თუმცა 2020 წლის საპარლამენტო არჩევნებისთის ქართული ოცნების საზოგადოებასთან ურთიერთობის მრჩევლად გადაინაცვლა. პოსტივის კიდევ ერთი მთავარი სახე, მფლობელი და წამყვანი შალვა რამიშვილი ხშირად ესხმის თავს კრიტიკულ მედიაგამოცემებს, სამოქალაქო აქტივისტებს, არასამთავრობო სექტორსა და ოპოზიციურ პარტიებს და არ მალავს, რომ მმართველი გუნდის მხარდამჭერია. 2005 წელს შალვა რამიშვილი $100 000-ის გამოძალვის ბრალდებით დაკავეს. 2018 წელს კი დამნაშავედ ცნეს თანამშრომლის, თათია სამხარაძის სექსუალურ შევიწროებაში. ამის მიუხედავად, ქართული ოცნების თავმჯდომარეს, ბიძინა ივანიშვილს ღიად გამოუხატავს სიმპატია მის მიმართ.

გარდა ამისა, DFRLab-მა აღმოაჩინა არაავთენტური ქსელი, რომელიც ულტრანაციონალისტური, ძალადობრივი პოლიტიკური პარტიის, ქართული მარშისა და პროსახელისუფლებო მედიაპლატფორმის, პოსტივის კონტენტის გასავრცელებლად გამოიყენებოდა. ქსელი გასართობი და შოპინგის პლატფორმების სახელით იყო შენიღბული და 30 ფეისბუქ ჯგუფს, 30 ფეიჯსა და 10 პერსონალურ ანგარიშს მოიცავდა.

ამ ეტაპზე POSTV-ის ოფიციალურად 6 თანამფლობელი ჰყავს: ნუგზარ რუხაძე (16%), ზვიად ბლიაძე (16%), შალვა რამიშვილი (24%), ანა შენგელია (8%), ვახტანგ კომახიძე (8%), თემურ ჭარელაშვილი (28%).