კომპანია ფრესკოს მარკეტინგის სამსახურის წარმომადგენელმა, მარიამ აფრიდონიძემ On.ge-სთან საუბარში განმარტა, თუ რატომ უპასუხა კომპანიამ შეურაცხმყოფელი ტექსტით სავარაუდოდ, მათი ყოფილი თანამშრომლების მიერ გავრცელებულ განცხადებას. ფრესკოს წარმომადგენლის თქმით, აღნიშნული ბრალდებები სიმართლეეს არ შეესაბამებოდა და სწორედ ამიტომ მათაც "შესაბამისად უპასუხეს":

"ჩვენი ფეისბუქის გვერდიდან გაკეთებულ კომენტარზე ვიტყვი, რომ მათი განცხადება არ შეესაბამებოდა სიმართლეს და როგორი დაუსაბუთებელი და არალოგიკური იყო იგი, შესაბამისად, ჩვენც გავეცით პასუხი იმის შესახებ, რომ ის რასაც ისინი წერდნენ, იყო ტყუილი. ჩვენ იმ ბრალდებებს სათითაოდ გავეცით პასუხი, ზუსტად იმ ნუმერაციით, რაც მათ ჰქონდათ გაკეთებული".

ფრესკოს მიერ გაკეთებულ კომენტარში, სადაც გამოყენებულია ტერმინები, "ქურდი", "უნიათო", "უსაქმური", მარკეტინგის სამსახური ამბობს, რომ თავს შეიკავებს განმარტებისგან, თუმცა მისი თქმით, ისინი მიმართული იყო იმისკენ, რომ მათ სხვადასხვა მიზეზით გაუშვეს თანამშრომლები სამსახურიდან:

"ეს ადამიანები სხვადასხვა მიზეზებით იყვნენ გათავისუფლებული, მათ შორისაა სამსახურში არ გამოცხადება. უახლოეს პერიოდში ვინც გათავისუფლდა, ვერ გეტყვი, რომ ქურდობის გამო იყო ეს, მაგრამ რა თქმა უნდა იყო ასეთი შემთხვევებიც და ეს ადამიანები აღარ მუშაობენ ჩვენთან".

მარკეტინგის სამსახურის ცნობით, კომპანია ფრესკოში დასაქმებულია ათასამდე ადამიანი და ბოლო პერიოდში გათავისუფლდა ათეულობით მათგანი, დაახლოებით ორმოცამდე, რის მიზეზადაც კომპანიის წარმომადგენელი ასახელებს, "შინაგანაწესის დარღვევას" და "ხელშეკრულების პირობების შეუსრულებლობას":

"ისინი არ ემორჩილებოდნენ ჩვენს წესებს. ჩვენ არ ვიცით ვის ეკუთვნის გავრცელებული განცხადება. ვინც წავიდა ყველას ვესაუბვრეთ და გავაცანით ის პუნქტები, რაც დაარღვიეს. ჩვენ მზად ვართ, ისევ გავცეთ პასუხი მათ კითხვებს".

გუშინ, 7 თებერვალს, ფრესკოს ყოფილი თანამშრომლების სახელით ფეისბუკის ერთ-ერთ გვერზე გავრცელდა განცხადება, სადაც ნათქვამია რომ მათ უსამართლო სამუშაო პირობების გარდა, თანამშრომლების მიმართ ზეწოლაც ხდება.