პრემიერმინისტრობის კანდიდატმა, ირაკლი ღარიბაშვილმა განაცხადა, რომ პოლიციელების უზარმაზარი რესურსი ცდება "დესტრუქციული ჯგუფების" დევნაზე. მისი თქმით, ამ ჯგუფების პროვოცირებული ქმედებები ქმნის ქაოსსა და დესტაბილიზაციას.

"თქვენ იცით, თუ რაოდენ მძიმე შრომას ეწევიან ეს ადამიანები. თუნდაც, პენიტენციური დაწესებულებებში და ა.შ. ყველგან. ამ ადამიანებს სჭირდებათ მოფრთხილება და ხელის გულზე ტარება. რა თქმა უნდა, იმ მძიმე სამუშაოს ემატება ეს პრობლემები, რომელიც ჩვენს ქვეყანაში არსებობს. ამას ემატება ის, რომ ეს დესტრუქციული ჯგუფები პირდაპირ პროვოცირებენ პოლიციელებზე და უზარმაზარი რესურსი ცდება ჩვენი პოლიციის ამ დესტრუქციული ჯგუფების დევნაზე.

საბოლოო ჯამში, ფონი იქმნება. ფონი ქაოსის, დესტაბილიზაციის. ამიტომ, ძალიან მკაცრი პოზიცია გვექნება და მკაცრი პოლიტიკა გვექნება ჩვენ ყოველ ასეთ გამოვლინებაზე. არავითარ კომპრომისს აღარ დავუშვებთ ჩვენ. პოლიციის მიმართ ნებისმიერ გადაცდომა იქნება დაუყოვნებლივ აღკვეთილი და სამაგალითოდ დასჯილი, კანონის ფარგლებში, რა თქმა უნდა", — განაცხადა ირაკლი ღარიბაშვილმა.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.

გაიგეთ მეტი: