პრემიერმინისტრობის კანდიდატის, ირაკლი ღარიბაშვილის განცხადებით, ის ოპოზიციას არ ებრძვის. აღნიშნულით მან ალეკო ელისაშვილის კითხვას უპასუხა.

"მე არ ვებრძვი ოპოზიციას და თქვენ ნუ ხართ აყოლილი ამ... გამოდით ამ კომპლექსიდან, ნაციონალური მოძრაობის კომპლექსიდან. მე ვიცი,რომ თქვენ ხართ სახელმწიფოებრივად მოაზროვნე, ამიტომაც ზიხართ აქ, პარლამენტში. მე ოპოზიციას კი არ ვებრძვი, მე ვებრძვი იმ ადამიანებს, ვინც უზარმაზარი ზიანი, გამოუსწორებელი ზიანი მიაყენა ჩვენს სახელმწიფოს, ვინც ტერიტორიები დაგვაკარგვინა, ვინც გაყიდა ჩვენი ისტორიული მიწები, ვინც ასი ათასობით ჩვენს მოქალაქეს პატივი, ღირსება, ნამუსი ახადა, გაასამართლა, ვინც ბიზნესები დაანგრია, ვინც აწამა, დატანჯა ჩვენი მოსახლეობა. ამ ხალხს ვებრძვი და ყველაფერს გავაკეთებ მე, რიგითი პოლიტიკოსი, რიგითი მოქალაქე, რომ ასეთი ანტისახელმწიფოებრივი ჩვენი ქვეყნის მტრები ვერასდროს ვეღარ დაბრუნდნენ ხელისუფლებაში", — განაცხადა ღარიბაშვილმა.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.

გაიგეთ მეტი: