ქართულმა ოცნებამ ირაკლი ღარიბაშვილის მთავრობას ნდობა გამოუცხადა. მე-10 მოწვევის პარლამენტში მთავრობის ახალი შემადგენლობა მმართველი გუნდის დეპუტატებმა 89 ხმით 2-ის წინააღმდეგ დაამტკიცეს. ირაკლი ღარიბაშვილი საქართველოს პრემიემინისტრი უკვე მეორედ გახდა.

ახალი მთავრობის დამკიცებას მხარი არ დაუჭირეს ოპოზიციის წარმომადგენლებმა. მოქალაქეების ლიდერმა, ალეკო ელისაშვილმა 21 თებერვლას თქვა, რომ მიუხედავად იმისა, 2 ხმა გადამწყვეტი ვერ იქნებოდა, ღარიბაშვილის კანდიდატურას მხარს არ დაუჭერდნენ. იმავეს ამბობდა ევროპელი სოციალისტების წარმომადგენელი, დავით ზილფიმიანიც. მისი განცხადებით, "შეიძლება რომელიღაცა მინისტრი" მოსწონდეთ ან არ მოსწონდეთ, მაგრამ ჯამში ამ მთავრობას მათი მხარდაჭერა არ ექნებოდა.

მხოლოდ 2 მინისტრით შეიცვალა ყოფილი პრემიერმინისტრის, გიორგი გახარიას მიერ წარდგენილი მინისტრთა კაბინეტი. კერძოდ, თავდაცვის მინისტრის პოსტი ღარიბაშვილის ნაცვლად, მისმა ყოფილმა მოადგილემ, ჯუანშერ ბურჭულაძემ დაიკავა. ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილი, ასევე მისმა მოადგილემ, ირაკლი ქარსელაძემ შეცვალა.

ღარიბაშვილმა დღეს პარლამენტს მისი გეგმა და ხედვები გააცნო. მიუხედავად იმისა, რომ სიტყვით გამოსვლისას ამტკიცებდა, ქვეყნაში არსებული ეკონომიკური კრიზისის დასაძლევად "მხოლოდ წინა ხელისუფლებასთან შედარება საკმარისი აღარ არის", მაინც დიდი დრო დაუთმო მათ კრიტიკას. იგი პარლამენტს გუნდთან ერთად ქვეყნის განვითარების "ახალი ამბიციური" ათწლიანი გეგმის შემუშავებასაც დაჰპირდა.

ამ გეგმის თანახმად, ახალი პრემიერმინისტრი ამბობს, რომ მისთვის პრიორიტეტული ქვეყანაში წესრიგის დამყარება და "რიგი დესტრუქციული ძალების კონსტიტუციურ ჩარჩოში" დაბრუნება, ასევე, ვაქცინის შემოტანა და ეკონომიკური კრიზისისგან "გარღვევა" იქნება. მან ვაქცინის შემოტანის თარიღად ყოფილი პრემიერმინისტრისგან გასნხავევბით, რომელიც გვპირდებოდა, რომ ვაქცინას თებერვალში მივიღებდით, მარტი დაასახელა. ამასთან, ქართული ოცნების დამფუძნებელსა და ყოფილ პრემიერმინისტრ ბიძინა ივანიშვილს პარლამენტის ტრიბუნიდან მადლობა ისევ გადაუხადა.

ახალი მთავრობის დამკიცების აუცილებლობა მას შემდეგ დადგა, რაც ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. იმავე დღეს ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა.