პრემიერმინისტრობის კანდიდატი, ირაკლი ღარიბაშვილი აცხადებს, რომ მისთვის პრიორიტეტი "ათწლიანი განვითარების ახალი ამბიციური გეგმის" შემუშავება იქნება. ამის შესახებ მან პარლამენტში სიტყვით გამოსვლისას ისაუბრა და ფრაქცია ქართულ ოცნებას ქვეყნის ეკონომიკური კრიზისიდან გამოყვანის საკუთარი ხედვა გააცნო.

"რაც შეეხება ჩემს ხედვას თუ როგორ მესახება ქვეყნის ეკონომიკური კრიზისიდან გამოყვანა, კიდევ ერთხელ მინდა აღვნიშნო მთავარი პრიორიტეტები. პირველი, რასაც საჭიროებს ახლა აღნიშნული სიტუაცია — ქვეყანაში წესრიგის დამყარება და რიგი დესტრუქციული ძალების კონსტიტუციურ ჩარჩოში დაბრუნებაა. რა თქმა უნდა, ჩვენი მთავარი პრიორიტეტი იქნება მოსახლეობისთვის ვაქცინების შემოტანა და ათწლიანი განვითარების ახალი ამბიციური გეგმის შემუშავება, რომელსაც მე ვაპირებ ჩემს გუნდთან ერთად", — განაცხადა მან.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

იმავე დღეს ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი მეორედ გახდება.