შინაგან საქმეთა მინისტრობის კანდიდატის, ვახტანგ გომელაურის განცხადებით, ნიკა მელიას საქმეზე სასამართლოს განჩინება აღსრულებას როდის დაექვემდებარება შეზღუდული არ არის.

"ვადები ასე ოფიციალურად გადაიდო, გადმოიდო არ არსებობს თემა. განჩინება სასამართლოსი, რომელიც დაეკისრა შინაგან საქმეთა სამინისტროს, აღსრულება მისი, ამას ჩვენ დღეს ავასრულებთ, ხვალ, 1 თვის შემდეგ, თუ 3 დღეში, შეზღუდული არ არის. ამას ახლა ვერ გეტყვით გადაიდო 1 დღით, 2 დღით, თუ 5 დღით", — განაცხადა გომელაურმა.

მისივე თქმით, აღსრულების ღონისძიების დროებით გადადების გადაწყვეტილება უშუალოდ მან მიიღო, ვინაიდან შუა ღონისძიების დროს პრემიერმინისტრის გადადგომა სწორი არ იქნებოდა.

პოლიტიკური კრიზისი საქართველოში 2020 წლის საპარლამენტო არჩევნების შედეგების გამოქვეყნების შემდეგ დაიწყო. ოქტომბერში ჩატარებულ არჩევნების შედეგებს ოპოზიცია არ აღიარებს და ხელახალი არჩევნების დანიშვნას თვეებია ითხოვს.

ამას თან დაერთო ნაციონალური მოძრაობის თამჯდომარის, ნიკა მელიასთვის აღკვეთის ღონისძიების სახით პატიმრობა შუფარდება.

მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.