ერთ-ერთი გამოთქმის მიხედვით, ცნობისმოყვარეობამ კატა მოკლა, თუმცა, ამ შემთხვევაში, ფისოს ასეთმა თვისებამ მთელი ოჯახი გადაარჩინა.

ორეგონის შტატში მცხოვრებ წყვილს, სანდი და მაიკ მარტინებს, თავშესაფრიდან რამდენიმე კატა ჰყავთ აყვანილი. ერთ-ერთი მათგანი 3 წლის ლილია, რომლის მიმართაც ოჯახს განსაკუთრებული დამოკიდებულება ჰქონდა.

ლილი სულ ცოტა ხნის წინ, გასული წლის დეკემბერში აიყვანეს, თუმცა, ამ მოკლე ხანშიც მოახერხა გმირული საქციელით კიდევ უფრო შეეყვარებინა თავი თავისი ახალი ოჯახისთვის.

ერთ დღეს, როცა სანდი ლილისთან ერთად თამაშობდა, კატას ყურადღება გაეფანტა და ბუხართან მდებარე თითბრის მილის სარქველს მიუახლოვდა. ლილიმ მეტალის სარქველს, უბრალოდ, უყნოსა, ამიტომ სანდიმ იფიქრა, რომ მას ბზინვარე ნივთი მოეწონა. თუმცა, როცა კატა ადგილს არ მოსცილდა, მისი პატრონი დაეჭვდა.

როდესაც სანდი ადგილს მიუახლოვდა და თავადაც უყნოსა მილს, გაზის სუნი ეცა.

"ძალიან მკრთალი სუნი იყო", — ამბობს კატის პატრონი, — "კვერცხის მძაღე სუნი კი არ ჰქონდა. ამიტომ დაეჭვებულმა ჩემს ქმარს ვთხოვე, თავადაც ეყნოსა".

როცა ოჯახის სამმა წევრმა სუნის არსებობა დაადასტურა, სასწრაფოდ გამოიძახეს დახმარება, რომელმაც, მოგვიანებით, მარტინებს უთხრა, რომ ძალიან საშიში გაჟონვა იყო და ისინი უბედურ შემთხვევას გადარჩნენ.

ფოტო: Sandi Martin

ფოტო: Sandi Martin

ლილის კი ოჯახში გმირის წოდება მიენიჭა, თუმცა, ამ შემთხვევამ წყვილი ააღელვა.

"ამ ბოლო დროს — პანდემიის და დანარჩენის გამო, ძალიან ადვილად მიპყრობს საშინელი ფიქრები", — ამბობს სანდი, — "ამიტომ, ახლა სულ იმას ვფიქრობ, რა მოხდებოდა, მე რომ არ დავინტერესებულიყავი ლილის ცნობისმოყვარეობის მიზეზით ან, სულაც, იქ არ ვყოფილიყავი".

თუმცა, რაც მთავარია, ყველაფერი კარგად დამთავრდა, გმირმა კი დამსახურებული ჯილდოც მიიღო — საყვარელი საჭმელი.