სტუდენტური მოძრაობა აუდიტორია 115 თბილისის სახელმწიფო უნივერსიტეტს 99 წლის იუბილეს ულოცავს.

მილოცვის ტექსტს სრულად გთავაზობთ.

1918 წლის 8 თებერვალს საქართველოსა და კავკასიის მთელ რეგიონში პირველი უმაღლესი სასწავლებელი დაარსდა. დღეს თბილისის სახელმწიფო უნივერსიტეტის დაფუძნებიდან 99 წელი გავიდა.

საქართველოში მეოცე საუკუნემდეც არაერთხელ ჰქონიათ უმაღლესი საგანმანათლებლო დაწესებულების ჩამოყალიბების მცდელობა. თუმცა, ყველა მსგავი წამოწყება წარუმატებლად დასრულდა.

პირველი ქართული უნივერსიტეტის დაარსებას წინ უძღოდა ორმოცდაათწლიანი ბრძოლა ცარისტული იმპერიალიზმის დამხობისა და ჩვენს ქვეყანაში დემოკრატიული ღირებულებების დამკვიდრებისათვის. ხელისუფლების საწინააღმდეგოდ განწყობილი გაზეთების გამოცემის, უამრავი საპროტესტო დემონსტრაციის, მუშათა გაფიცვების, ჟანდარმერიასთან შეტაკებების, მემარცხენე და დემოკრატიული წრეების მუშაობის, ფემინისტური კლუბების ფუნქციონირებისა და სხვა მსგავსი ანტისისტემური საქმიანობების გარეშე არ შეიქმნებოდა ხელსაყრელი პოლიტიკური ვითარება, რომელიც დამფუძნებელ პროფესორებს უნივერსიტეტის გახსნის შესაძლებლობას მისცემდა.

თითქმის ერთი წელია „აუდიტორია 115“ სამოქალაქო წინააღმდეგობის პროცესში მონაწილეობს. მესამე თვეა დაკავებული გვაქვს თსუ-ის მეექვსე კორპუსი. ჩვენ გვწამს, რომ ჩვენი ბრძოლით უნივერსიტეტისა და განათლების სისტემის რადიკალური გარდაქმნისთვის აუცილებელ საზოგადოებრივ-პოლიტიკური გარემოს შექმნას ვუწყობთ ხელს.

ჩვენ ერთგულები ვრჩებით იმ სიტყვების, რომლებიც უნივერსიტეტის დაფუძნების საზეიმო ცერემონიალზე პირველივე გამომსვლელმა წარმოთქვა:

„ქართული უნივერსიტეტის უწმინდესი მოვალეობაა ემსახუროს დემოკრატიის კანონიერ მოთხოვნილებებს, იგი უნდა დაუახლოვდეს ხალხს. თუ წინათ ეროვნული კულტურა ვიწრო ჯგუფისთვის იყო ხელმისაწვდომი, დღეს ეროვნული კულტურა მხოლოდ მაშინ არის ეროვნული, როცა მთელი ხალხისთვის ხელმისაწვდომი გახდება. არ უნდა იყოს არავითარი განსხვავება. ყველას უნდა ჰქონდეს საშუალება დაეწაფოს მეცნიერებას. მეცნიერება უნდა იყოს დემოკრატიის დამცველი. დემოკრატიასა და მეცნიერებას შორის არსებული კავშირი უნდა იყოს დაცული ქართულ უნივერსიტეტში.“

გილოცავთ!