პარლამენტის თავმჯდომარემ, არჩილ თალაკვაძემ უმრავლესობის ლიდერის, ირაკლი კობახიძის თავისუფლების საპარლამენტო ორდენით დაჯილდოვების ინიციატივით ბიუროს მიმართა.

"მოგმართავთ, რომ საქართველოს პარლამენტის წევრი, უმრავლესობის ლიდერი, ბატონი ირაკლი კობახიძე წარვადგინოთ თავისუფლების საპარლამენტო ორდენზე, დავაჯილდოვოთ ამ ორდენით. მოგეხსენებათ, მან განუზომლად მნიშვნელოვანი წვლილი შეიტანა საკონსტიტუციო რეფორმაში, როგორც პარლამენტის წინა თავმჯდომარე, ხელმძღვანელობდა საკონსტიტუციო რეფორმას", — განაცხადა თალაკვაძემ.

როგორც თალაკვაძემ აღნიშნა, ორდენით დასაჩუქრება ფულად ჯილდოსაც ითვალისწინებს, თუმცა კობახიძე აპირებს, რომ აღნიშნული თანხა ონკოპაციენტ ბავშვებს გადაურიცხოს.

კანონმდებლობის მიხედვით, თავისუფლების საპარლამენტო ორდენი გადაეცემა საქართველოს მოქალაქეს, მოქალაქეობის არმქონე პირსა და უცხოელს პარლამენტარიზმის, ქვეყნის, თავისუფლებისა და დემოკრატიის განვითარებაში, ტოლერანტობასა და ადამიანის უფლებების დაცვაში, საქართველოს პარლამენტის მიერ დასახული ამოცანების განხორციელებაში შეტანილი თვალსაჩინო წვლილისათვის.