პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, პრემიერობის კანდიდატ ირაკლი ღარიბაშვილს ქართული ოცნების გუნდი ერთსულოვნად დაუჭერს მხარს.

"ირაკლი ღარიბაშვილი არის ძალიან გამოცდილი პოლიტიკოსი, ჩვენი გუნდის გამოკვეთილი ლიდერი, შესაბამისად, ირაკლი ღარიბაშვილს ექნება ჩვენი გუნდის ერთსულოვანი მხარდაჭერა", — აღნიშნა ოხანაშვილმა.

გარდა ამისა, დეპუტატმა თქვა, რომ არ აქვს კითხვები ღარიბაშვილთან, რადგან მისი სახელი "პროფესიონალიზმთან და ქვეყნის სიყვარულთან" არის დაკავშირებული.

ქართული ოცნების პრემიერმინისტრობის კანდიდატი ირაკლი ღარიბაშვილი იქნება. ამის შესახებ ქართული ოცნების პოლიტსაბჭოს სხდომის შემდეგ გახდა ცნობილი. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი უკვე მეორედ გახდება.

ქართული ოცნების თავმჯდომარის, ირაკლი კობახიძის განცხადებით, ღარიბაშვილი პოლიტსაბჭოს მან წარუდგინა და გადაწყვეტილება ერთხმად მიიღეს. მისივე განცხადებით, ღარიბაშვილის მინისტრობისა და პრემიერმინისტრობისას განხორციელდა უმნიშვნელოვანესი რეფორმები, ის არის "გამორჩეული გამოცდილების მქონე პროფესიონალი", რომელსაც შეუძლია წარმატებით გაუძღვეს მთავრობის საქმიანობას და იზრუნოს იმ გამოწვევებზე, რომლებიც ქვეყნის წინაშე დგას.

მმართველმა გუნდმა კანდიდატი პრემიერმინისტრ გიორგი გახარიას გადადგომიდან რამდენიმე საათში წარადგინა. გახარიამ პოსტი 18 თებერვლის დილას დატოვა და ამის მიზეზად ნიკა მელიას საქმეზე თანაგუნდელებთან აზრთასხვადასხვაობა დაასახელა.

გიორგი გახარიას თქმით, მისი ურყევი პოზიციაა, რომ "ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძიების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ესკალაციის შესაძლებლობას, არის მიუღებელი".