პარლამენტის თავმჯდომარემ ირაკლი კობახიძემ ჟურნალისტებთან საუბრისას მოსამართლეების საქმესთან დაკავშირებით განაცხადა, რომ საკითხის აქტუალობიდან გამომდინარე, პარლამენტი მის მონიტორინგს ახორციელებს:

"ეს საკითხი განსაკუთრებული აქტუალობით სარგებლობს და შესაბამისად, ბუნებრივია პარლამენტის განსაკუთრებული მეთვალყურეობის ქვეშ უნდა იყოს. ჩვენი მხრიდან ყველა ამ პროცესის მონიტორინგი ხორციელდება და საჭიროების შემთხვევაში გვექნება რეაგირება".

პროკურატურის მტკიცებით, 2017 წლის 11 იანვარს, უზენაესი სასამართლოს მოსამართლეებმა, ბესარიონ ალავიძემ და პაატა ქათამაძემ, საცხოვრებელი სახლის მისამართებზე მიიღეს წერილი, რომელსაც ნაბეჭდი ასოებით აწერია ავტორი "დ. საყვარელიძე". აღნიშნული წერილით, გამომგზავნი მოსამართლეებს სთავაზობს გარკვეული ქმედებების განხორციელებას და ამ ქმედებების სანაცვლოდ არამართლზომიერ სარგებელს. ამ და გამოძიების სხვა დეტალების შესახებ პროკურატურამ განცხადება დღეს გაავრცელა.

რუსთავი 2-თან სატელეფონო საუბრისას, დავით საყვარელიძემ კატეგორიულად უარყო საქმესთან რაიმე კავშირი და თქვა რომ პროკურატურის ბრალდება არის "უნამუსობა, არაკაცობა და სისხლის სამართლის დანაშაული".