ქართული ოცნების დეპუტატის, სოზარ სუბარის განცხადებით, თუ ოპოზიციის წარმომადგენლები პოლიციას ფიზიკურ წინააღმდეგობას გაუწევენ კანონის აღსრულებისას, რეაგირება მათზეც ისეთივე იქნება, როგორც ნებისმიერ მოქალაქეზე ან "ქუჩის ხულიგანზე". მისი თქმით, კანონი ყველასთვის კანონია და "არ არსებობს ჩინიანი და უჩინო".

"კანონი აღსრულდება, კიდევ ერთხელ გავიმეორებ და ვერავინ შეეწინააღმდეგება მას. თუ ვინმე ზედმეტს იზამს ამ წინააღდეგობის გაწევაში და მართლა შეეცდება, კანონი მათ მიმართაც ზუსტად ისეთივეა, როგორიც ნებისმიერი მოქალაქის მიმართ", — განაცხადა სუბარმა პალიტრანიუსის ეთერში.

მისი თქმით, ოპოზიცია თამაშობ და უკვე ყელში ამოუვიდა.

"ამ სისულელის მოსმენა მართლა აღარ შეიძლება. ამ თამაშით დაიღლებიან თვითონაც, რატო ვერ ეგუებიან წაგებას?!" — განაცხადა მან.

სხვადასხვა პოლიტიკური პარტიის ოპოზიციის ლიდერები ამბობენ, რომ ფარად დაუდგებიან მელიას და მისი დაკავების უფლებას არ მისცემენ, რადგან უკანონო გადაწყვეტილებას არ ემორჩილებიან. ისინი ნაციონალური მოძრაობის ოფისში ნიკა მელიასთან ერთად არიან შეკრებილები და მორიგეობას გეგმავენ.

თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.